Hættir með Matar­gjafir á Akur­eyri með sorg í hjarta

Sigrún tilkynnti fyrir helgi að vegna mikils álags verði hún að hætta með hópinn.

„Með sorg í hjarta hef ég ákveðið að hætta með Matargjafir Akureyri og nágrenni þann 1. maí 2024. Álagið í kringum þessa sjálfboðavinnu hefur verið gríðarlegt fyrir mig og fjölskyldu mína, álag vegna matarkassana sem og öll skilaboðin allan sólarhringinn alla daga ársins,“ segir hún í færslu sem hún birti í grúppunni í vikunni.

„Starfsemin hefur falist í því að láta fólk fá mat sem það getur ekki keypt sjálft,“ segir Sigrún í samtali við fréttastofu. Hún segir að hópurinn hafi verið stofnaður af henni og Sunnu Ósk Jakobsdóttir en að Sunna Ósk hætti nokkru síðan. Sigrún var kjörin Norðlendingur ársins árið 2022 fyrir framtakið.

230 einstaklingar 

Í hópnum eru alls 3.300 meðlimir og hefur beiðnum fjölgað svakalega síðustu vikur að sögn Sigrúnar. Á sama tíma hefur þeim fækkað sem leggja inn á reikning samtakanna eða gefa mat, en flestir sem gefa þeim fjármagn eru einstaklingar. Sigrún telur að þær séu að styrkja tæplega 230 einstaklinga á mánuði og séu að gefa alls þrjár og hálfa milljón á mánuði í formi Bónuskorta. Að meðaltali er um fimmtán þúsund inn á hverju Bónuskorti.

„Ég ræð ekki við þetta. Þetta er fyrir utan heima hjá mér og aðsóknin í matarkassana er orðin svo mikil. Það er stanslaus straumur af fólki. Ég get aldrei farið í frí og þetta er allan sólarhringinn,“ segir Sigrún.

Fleiri og fjölbreyttari

Hún segir hópinn sem leitar til þeirra orðinn fjölbreyttari síðustu ár. Um sé að ræða fólk sem þiggi atvinnuleysisbætur en einnig eldra fólk og innflytjendur. Hvað varðar ástæðu fjölgunar segir hún það sama og hjá öðrum. Vextir og verðbólga sé há og matarkarfan hafi hækkað í verði.

„Millistéttin sem hefur verið að gefa okkur peninga hefur líka minna á milli handanna. Þá er innkoman minni hjá okkur,“ segir Sigrún.

Hún er ákveðin í því að losa sig við skápinn þann 1. maí en vonar að einhver annar setji upp skáp hjá sér eins og Rauði krossinn eða Hertex.

Fátæktin jókst

Hún segir að enginn hafi enn sem komið er ákveðið að taka við rekstrinum en að hún sé í viðræðum við einn einstakling. Hún segir að ef einhver taki við rekstrinum sé ómögulegt að hafa þetta heima. Betra væri að hafa þetta við eitthvað fyrirtæki eða stofnun.

„Hugmyndin var upphaflega að vera með mat í frískáp. En svo jókst þetta og fátæktin varð meiri og beiðnum fjölgaði. Þetta varð miklu meira en við sáum fyrir okkur í upphafi. Þetta er miklu meira en 100 prósent starf. Þetta er allan sólarhringinn. Ég þarf yfirleitt að slökkva á símanum um klukkan tíu á kvöldin. Fólk veit ekki hvað það á að gera þegar það á ekki fyrir mat eða nesti fyrir börnin sín. Við erum síðasta úrræðið,“ segir Sigrún og að það gæti oft mikillar örvæntingar hjá fólki þegar það leitar til hennar.

„Þess vegna er ofboðslega sorglegt að þetta sé orðið svona. En þetta er orðið svo mikið batterí að ég ræð ekki við þetta.“

Biðlisti um leið og úthlutun er lokið

Herdís Helgadóttir hjá Mæðrastyrksnefnd Akureyrar tekur í sama streng og Sigrún.

„Það er töluvert mikil fjölgun. Þetta er vandi sem við sjáum vel að á meðan eftirspurn eftir aðstoð eykst er ekki að aukast fjármagnið til okkar,“ segir Herdís sem starfar hjá Hjálpræðishernum á Akureyri og kemur því að úthlutunum hjá Mæðrastyrksnefnd á Akureyri.

Í gær var úthlutun hjá nefndinni og er strax kominn biðlisti í þá næstu. Hún segir að í hverjum mánuði séu um 60 til 70 heimili að leita til þeirra. Fyrir átta árum hafi verið um átta til tíu í heimili í hverri úthlutun. Nú séu þau um 25 til 30.

„Við lokum fyrir þegar það er komið upp í 30 því við höfum ekki bolmagn, tíma eða sjálfboðaliða til að aðstoða fleiri.“

Fólk sem til þeirra leitar fær úthlutað inneignarkorti í matvöruverslun sem fer eftir fjölskyldustærð. Herdís segir að hún vonist til þess að geta haldið fjárhæðunum eins og þær eru en ef að eftirspurnin haldi áfram að aukast og fjármagnið haldi ekki í við þurfi nefndin að endurskoða upphæðina.

Herdís segir eins og Sigrún að hópurinn sem til þeirra leiti sé fjölbreyttur og það sé gríðarleg aukning. Það muni hafa áhrif þegar Sigrún hættir.

„Það hefur allur grunnkostnaður hækkað svo mikið. Að borga reikninga, húsaleigu eða lán, er alltaf að verða meira og svigrúmið minna. Á sama tíma er matarkarfan að vera dýrari. Þá er það þungt högg fyrir marga þegar það fækkar í þeim úrræðum sem hægt er að leita til.“

Herdís segir sjóðinn að miklu leyti fjármagnaðan af fyrirtækjum. Það sé einnig hart í ári hjá þeim og því óttist þau að fjármagn muni minnka í sjóðinn.

„Þetta er erfitt. Við erum vön að sjá sveiflur í eftirspurn, en þessi hækkun er skarpari og það sem verra er að við sjáum ekkert endilega neina niðursveiflu á móti eða að hún sé á leiðinni.“

Fréttin hefur verið leiðrétt. Herdís er Helgadóttir en ekki Egilsdóttir. Leiðrétt 10.18 þann 20.4.2024.