Vonast til að af­greiða hvalveiðileyfi eins hratt og mögu­legt er

Þetta sagði hún í óundirbúnum fyrirspurnatíma á Alþingi fyrr í dag. Teitur Björn Einarsson þingmaður spurði Bjarkeyju hvað skýrði það að erindinu, sem hefur legið fyrir frá í janúar, hafi enn ekki verið svarað.

„Það er margt í þessu sem þarf að huga að. Auk þess að taka afstöðu til þessara fyrirliggjandi umsókna þarf líka að gefa út viðauka við reglugerð um hvalveiðar um leyfilegt heildarveiðimagn ársins, af því að hv. þingmaður kom inn á það. Þessi viðauki byggir á ráðgjöf Hafrannsóknastofnunar sem rann út núna um áramótin á sama tíma og þau leyfi sem þá runnu út. Það er í rauninni margt sem verið er að draga saman,“ segir Bjarkey.

Hún tekur fram að veikindi forvera hennar, Svandísar Svavarsdóttur, hafi auðvitað haft áhrif á málsmeðferðartímann og einnig að hún hafi viljað verja góðum tíma til að fara yfir málið.

„Ég hef sagt að ég hyggist reyna að hraða því að fá til mín öll þau gögn sem ég tel að ég þurfi til að taka ákvörðun um þetta þannig að vel megi vera og ég vonast til þess að það gerist bara núna tiltölulega fljótlega. Þó að ég geti ekki lofað því nákvæmlega,“ segir Bjarkey en tekur fram að hún geti ekki lofað að það verði afgreitt innan neinnar ákveðinnar dagsetningar en að hún vilji temja sér þá stjórnsýslu að afgreiða mál eins hratt og mögulegt er.

Lögin ekki nægjanlega skýr

Teitur Björn fór þá aftur upp í ræðustól og benti á að málshraðareglan sé grundvallarregla til að tryggja réttindi borgara gagnvart stjórnvöldum og fyrirbyggja að stjórnvöld valdi tjóni með ómálefnalegum töfum.

„Ég vil líka að lokum, frú forseti, spyrja hæstvirtan ráðherra hvort það sé ekki alveg ljóst að atvinna og hagsmunir fjölda fólks eru í húfi, að nærsamfélaginu, auk fyrirtækja sem þjónusta hvalveiðifyrirtækin, muni mikið um að starfsemi þessi fái að halda áfram í sumar,“ spyr Teitur.

Bjarkey sagðist þá vilja árétta að það sé snúið fyrir nýjan ráðherra að setja sig inn í mál sem þessi og að búið sé að skipa starfshóp um framtíð hvalveiða. Þar verður tekið mið af áframhaldandi veiðum, takmörkun eða banni til framtíðar.

„Ég held að það sé bara mikilvægt líka fyrir mig að átta mig á því, þó að það eigi ekki við um akkúrat það sem koma skal núna fyrir sumarið, að við náum betur utan um greinina en mér finnst alla vega málin standa í dag, því að það er ekkert launungarmál að lögin eru gömul og þau eru ekki að mínu mati nægjanlega skýr,“ segir Bjarkey að lokum.