Þórsarar hafa spilað þrjá oddaleiki síðan Njarðvík var síðast í oddaleik

Óskar Ófeigur Jónsson skrifar 25. apríl 2024 14:46

Tómas Valur Þrastarson er ekki gamall en hann er engu að síður að fara að spila sinn fjórða oddaleik í kvöld. Vísir/Bára

Stórleikur fer fram í Ljónagryfjunni í Njarðvík í kvöld þegar heimamenn í Njarðvík og Þórsarar spila hreinan úrslitaleik um sæti í undanúrslitaeinvígi Subway deildar karla í körfubolta.

Einvígið gæti ekki verið mikið jafnara. Bæði lið hafa unnið tvo leiki og bæði lið hafa líka unnið útileik í einvíginu.

Leikurinn hefst klukkan 19.15 og verður sýndur beint á Stöð 2 Sport. Útsendingin hefst með Körfuboltakvöldsstrákunum klukkan 18.45. Þeir gera síðan lika leikinn upp eftir hann og velja PlayAir leiksins og Play leiksins.

Njarðvíkingar tryggðu sér oddaleik á heimavelli með því að vinna síðasta leik í Þorlákshöfn en tveir síðustu leikir einvígisins hafa einmitt unnist á útivelli.

Þórsarar þekkja það mjög vel að vera í þessari stöðu því þetta verður fimmti oddaleikur liðsins á síðustu fimm árum.

Í raun hafa Þórsarar spilað þrjá oddaleiki síðan Njarðvík var síðast í oddaleik í átta liða úrslitum 2019. Þá spiluðu þessi lið sitthvorn oddaleikinn sama kvöldið.

Þórsarar voru síðan í oddaleik á móti Stjörnunni í undanúrslitum á leið sinni að Íslandsmeistaratitlinum 2021 og spiluðu tvo oddaleiki í úrslitakeppninni í fyrra, fyrst unnu þeir Hauka á útivelli í oddaleik í átta liða úrslitunum en töpuðu svo á móti Val á Hlíðarenda í oddaleik í undanúrslitunum.

Njarðvík vann fyrsta leikinn í einvíginu nokkuð sannfærandi en síðustu þrír leikir hafa allir verið æsispennandi og síðasti leikurinn í Ljónagryfjunni endaði í framlengingu.