Sama sorg­lega lausnin og vana­lega: Drögum kvenna­liðið úr keppni

Það lítur hreinlega út að það sé orðin ásættanleg lausn á fjárhagsvandræðum félaga í íslenskum körfubolta að leggja niður kvennalið félagsins eða færa það niður um deild.

Ávallt er talað um að þetta sé bara tímabundið og að stefnan sé að koma aftur upp liði í framtíðinni.

Áhyggjuefnið er hins vegar aðallega er að þetta er að gerast aftur og aftur og aftur. Það er litið á þetta sem eina bestu lausnina þegar á að taka til í fjármálum félaganna. Setjum bara stelpurnar til hliðar.

Fyrr í vetur hætti Breiðablik keppni á miðju tímabili og kvennakarfan er því að horfa upp á tvö félög gefast upp á nokkrum mánuðum.

Dæmin eru aftur á móti miklu miklu fleiri á síðustu árum. Skallagrímur, Stjarnan, Grindavík, KR og Snæfell hafa öll farið þá leið að hætta eða gefa eftir sætið sitt í efstu deild. Enn aftar í tíma og þá má nefna dæmi með Njarðvík, Hauka og Val sem eru þó til fyrirmyndar með kvennastarfið sitt í dag. Þá eru ótalin þau félög sem hafa hætt með kvennalið í neðri deildum.

Stjarnan og Grindavík stóðu vissulega við loforð sín og komu til baka upp í efstu deild með lið full af uppöldum leikmönnum og hafa kannski réttlætt ákvörðun sína að einhverju leiti. Fórnarkostnaður og álitshnekkir kvennakörfunnar eru bara of miklir.

Félögin vildu öll fjölga liðum í efstu deild og þau voru tíu talsins í vetur, áður en þau urðu níu á miðjum vetri.

Síðast þegar fjölgað svona mikið í deildinni á tíunda áratugnum þá leið ekki langur tími að hvert félagið á fætur öðru gafst upp. Liðin fóru úr tíu í fimm á aðeins nokkrum árum.

Nú verður fróðlegt að sjá framhaldið. Hamar/Þór og Aþena eru komin upp í Subway-deildina og hafa bæði sýnt metnað og framtakssemi í að byggja upp unga kjarna sem hægt er að stóla á. Vonandi eru þau rekin skynsamlega og fyrir framtíðina en ekki bara fyrir daginn í dag.

Liðin sem hafa lagt upp laupana síðustu ár eiga nefnilega það mörg sameiginlegt að vera uppfull af erlendum leikmönnum og aðkomuleikmönnum. Leikmönnum sem eru ekki aldar upp hjá félaginu og hafa flakkað á milli félaga. Þegar þessir leikmenn fljúga í burtu skilja þeir eftir stór skörð.

Afsakanir Fjölnisfólks er því nánast afritun á afsökun allra hinna liðanna sem hafa gefið upp.

„Staðan er því sú að við erum því miður ekki með nægilega marga meistaraflokksleikmenn til að halda úti æfingum, hvað þá að halda úti samkeppnishæfu liði í Subway deildinni á komandi leiktíð, án þess að fá til liðsins leikmenn sem Fjölnir hefur ekki efni á eins og staðan er í dag,“ segir í í fréttatilkynningu Fjölnis.

Þetta höfum við lesið svo oft áður. Á sama tíma eru karlalið félagsins flest uppfull af atvinnumönnum og erlendum leikmönnum.

Það þarf að grípa í taumana. Körfuknattleikshreyfingin og Körfuknattleikssambandið þurfa að finna leið þannig að þetta sé ekki efst á blaði yfir ásættanlegar lausnir á fjárhagsvandræðum félaga. Þetta á ekki að koma til greina og við verðum að koma þessu út af borðinu ekki seinna en í dag.