Sau­tján tíma ferða­lag með krefjandi Steinda fram­undan

Tökur eru að hefjast á þáttaröðinni en í hinu liðinu verða engir aukvisar, að minnsta kosti ekki þegar það kemur að skemmtun. Pétur Jóhann og Sveppi Krull halda í þessum töluðu orðum til Suður-Afríku til að etja kappi við þá Audda og Steinda. 

Um er að ræða fimmtu þáttaseríu Draumanna.

„Við erum núna að pakka og horfa á United tapa, þannig það liggur ekkert mjög vel á mér eins og stendur,“ segir Auddi í samtali við Vísi. Hann talar frá Katar. Þaðan eiga þeir flug til Nýja-Sjálands sem verður fyrsti leggur draumsins. Fleira segist Auddi ekki vita um mánaðarferðalagið framundan. 

„Ég veit bara að við erum að fara til Nýja Sjálands vegna þess að við vorum sérstaklega spurðir hvort við myndum leggja það á okkur.“

„Hér eru líka Fannar Scheving tökumaður og klippari, og Fannar Sveins pródúsent. Bene­dikt Vals­son er síðan hinu megin með Sveppa og Pétri þannig við erum með Hraðfréttagengið með okkur. Þeir fara til Suður-Afríku en svo hittumst við í lokin í svona „Final-Showdown“,“ segir Auddi.

Spurður hvert uppleggið fyrir næsta mánuð sé segir hann:

„Fyrsta upplegg bara að koma sér til Nýja Sjálands. Við lendum um klukkan fjögur um nótt þannig við tökum einn dag í „recovera“  en svo verður þetta bara númer eitt, tvö og þrjú að gera gott sjónvarp.“

Auddi er strax farinn að furða sig á liðsfélaganum. 

„Steindi Jr fer víst ekki á WiFi erlendis. Ætlar ekki að láta hakka inn í kerfið sitt...þetta verður langur mánuður!“ skrifar hann á X. 

„Þetta er bara prinsipp-mál hjá honum,“ útskýrir Auddi. „Ég spurði hann hver ætti að reyna að komast í símann hans en það er fátt um svör. Það nýjasta hjá honum núna er að tala um að vera að „spila á líkamann sinn eins og fiðlu,“ segir Auddi. 

„Það þýðir sem sagt að taka enga sénsa og hafa allt samkvæmt venju. Hann ætlar ekki að borða fisk, eða fara í sund eða gufu. Spila á líkamann eins og fiðlu. Þetta er stundum eins og að ferðast með þriðja barninu sínu.“