Mættu í flugbúningi á sveitaböllin og áttu séns

Í þættinum Flugþjóðin sýna þau Inga Dagfinnsdóttir, dóttir Dagfinns Stefánssonar flugstjóra, og Ríkharður Jónsson frá Brúnastöðum okkur bækistöð síldarleitarflugs Loftleiða við Miklavatn.

„Hér voru þeir frumkvöðlarnir Alfreð, Kristinn Olsen, pabbi, Smári Karlsson og fleiri. Og þeir flugu hérna daginn út og daginn inn í leit að síldinni. Þarna var verið að byggja upp heila starfsgrein í fluginu,“ segir Inga.

Margar af bestu ljósmyndunum sem til eru frá upphafsárum Loftleiða tók fyrsti flugvirki félagsins, Halldór Sigurjónsson. Sonur hans, Kristinn Halldórsson, varðveitir myndasafn föður síns og sýnir í þættinum fjölda sögulegra mynda, meðal annars frá síldarleitinni.

Systkinin Geirþrúður og Haukur Alfreðsbörn svara því hversvegna talað er um Loftleiðaævintýrið en aðeins tveimur árum eftir stofnun félagsins keyptu Loftleiðamenn fjögurra hreyfla Skymaster-flugvél, fjarka, fyrstu stóru millilandaflugvél Íslendinga.

Ríkharður Jónsson man eftir upphafinu á Miklavatni en hann var þá níu ára gamall. Á vatnsbakkanum sýnir hann okkur minjar frá síldarleitinni og rifjar upp sögur af samskiptum Loftleiðamanna við Fljótamenn.

Þau Inga og Ríkharður lýsa tilverunni við Miklavatn hjá þessum brautryðjendum íslensks atvinnuflugs. Þeir sváfu í tjöldum, veiddu silung í matinn og gerðu við flugvélarnar undir berum himni.

„Það voru böll í Haganesvík, það var kallað Hótel Vík, og ég heyrði að þeir hefðu verið eftirsóttir á þessum böllum, af kvenþjóðinni. Þeir fóru í sínum flugbúningi og húfu og þá náttúrlega tóku þær eftir þeim. Þeir áttu séns,“ segir Ríkharður.

Í þættinum er heilsað upp á fyrrum Loftleiðastarfsmenn í Aðdáendaklúbbi Loftleiða en einnig flugfreyjur sem unnu hjá Loftleiðum og kalla sig Átturnar. Þær hafa meira að segja fyrrverandi forsætisráðherra í hópnum, Jóhönnu Sigurðardóttur, sem hóf ferilinn á DC 6-vélum.

Þátturinn um Loftleiðir verður endursýndur á Stöð 2 síðdegis í dag, sunnudag, klukkan 16:55. Hér má sjá tíu mínútna myndskeið úr þættinum:

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvenær sem er. 

Fjórði þáttur er á dagskrá annaðkvöld, mánudagskvöld, klukkan 19:10. Hann fjallar um umfang flugstarfsemi á Íslandi og efnahagsáhrif hennar.