Um­ræða á Bylgjunni ekki í­gildi stjórnvaldsákvörðunar

Dóra Björt Guðjónsdóttir formaður umhverfis- og skipulagsráðssegir Sjálfstæðisflokkinn hafa kokgleypt áróður uppbyggingaraðila um að nauðsynlegt sé að víkka vaxtarmörk í þágu byggingar á „einangruðu elligettói á viðkvæmu vatnsverndarsvæði“ í Gunnarshólma. Hildur Björnsdóttir oddviti Sjálfstæðisflokksins í Reykjavík gagnrýndi Dóru fyrr í dag fyrir að andmæla áformum um uppbyggingu húsnæðis að Gunnarshólma. 

Tekist á um orð Bjarna

Forsaga málsins er sú að Bjarni Benediktsson forsætisráðherra sagði í kappræðum RÚV á föstudagskvöld að Kópavogsbæ og Reykjavíkurborg greini á um vaxtarmörk höfuðborgarsvæðisins.

„Þetta er auðvitað ekki boðlegt. Það er land sem er til reiðu og hægt að byggja á. En Reykjavíkurborg neitar og vill stunda meiri þéttingu,“ sagði Bjarni í kappræðunum. 

Pawel Bartoszek sagði í Facebook færslu í dag að Bjarni hafi ruglast á sveitarfélögum. Ágreiningurinn standi milli Kópavogs og Garðabæjar. Svæðisskipulagsnefnd hafi samþykkt að auglýsa tillögu um stækkun vaxtarmarka á svæði sem heitir Rjúpnahlíð. Málið hafi verið tekið fyrir í bæjarstjórn Kópavogs og fellt þar. 

Þá tók Hildur Björnsdóttir oddviti Sjálfstæðisflokks í Reykjavík til máls á Facebook og andmælti ummælum Pawels. Hún sagði Dóru Björt Guðjónsdóttur, formann umhverfis- og skipulagsráðs Reykjavíkurborgar, hafa verið fljót að andmæla áformum um útvíkkun vaxtarmarka í þágu uppbyggingar að Gunnarshólma. Dóra hafi með því sent skýr skilaboð um að borgarstjórn myndi ekki fallast á áformin. 

„Ég verð að undirstrika, fyrst misskilningur virðist vera uppi um ferli málsins, að orð mín í Bítinu á Bylgjunni eru ekki ígildi formlegrar samþykktar eða stjórnvaldsákvörðunar í samhengi við beiðni um færslu vaxtarmarkanna, beiðni sem hefur í reynd ekki einu sinni komið formlega fram,“ skrifar Dóra Björt í færslu á Facebook. 

Einangrað elligettó

Dóra vísar í viðtalið hér að neðan, sem tekið var í janúar og fjallar um fyrirætlanir meirihlutans í Kópavogi um uppbyggingu svokallaðs lífsgæðakjarna við Gunnarshólma. Þar segir hún undarlegt að Kópavogsbær hafi fleygt fram viljayfirlýsingu um uppbygginguna án þess að ræða við önnur sveitarfélög höfuðborgarsvæðisins. Þá segir hún hugmyndina óraunsæja þrátt fyrir að vera fallega. 

Í Facebook færslunni segir Dóra fyndið að hlusta á Bjarna Benediktsson formann Sjálfstæðisflokksins impra á því sem góðri hugmynd og lausninni við húsnæðisvandanum að skapa einangrað elligettó á viðkvæmu vatnsverndarsvæði. Það sé hugmynd Kópavogs sem hefur verið í umræðunni.

Pláss fyrir 57 þúsund íbúðir

Þá segir hún að hugmyndin um víkkun vaxtarmarkanna í þágu uppbyggingar sé „hreinn og beinn áróður sem á uppsprettu sína hjá uppbyggingaraðilum sem hafa keypt sér ódýrt landbúnaðarland og vilja fá út úr því sem mestan gróða.“

Sjálfstæðisflokkurinn hafi kokgleypt þá hugmynd að nauðsynlega þurfi að færa vaxtarmörkin, en innan þeirra sé laust svæði fyrir uppbyggingu 57 þúsund íbúða. 

„Vandinn liggur því minnst í lóðaskorti eða þéttingu byggðar. Hann liggur í efnahagsástandinu, verðbólgunni og vaxtarkjörunum en ég get svo sem skilið að það henti Sjálfstæðisflokknum ágætlega að færa athygli fólks frá þeirra takmarkaða árangri þegar kemur að því að skapa efnahagslegan stöðugleika hér á landi. Þá er voða gott að geta bara kennt meirihlutanum í Reykjavíkurborg um. Einföld skilaboð sem svo eru margfölduð og ítrekuð. Áróðursmaskínan sefur aldrei,“ segir í færslu Dóru.