Samfylkingin bætir við sig þremur prósentum milli vikna í nýjustu könnun Maskínu og mælist nú með 22,7 prósenta fylgi. Eftir að hafa verið á niðurleið síðan í maí bætir flokkurinn í fyrsta sinn við sig milli kannana. Viðreisn er enn á uppleið og bætir við sig einu prósentustigi. 

Enn er marktækur munur á Viðreisn og Sjálfstæðisflokki, sem bætir þó við sig og er nú í 14,6 prósentum. Litlar eða engar breytingar eru á fylgi Miðflokks, Flokks fólksins, Vinstri grænna og Lýðræðisflokks. Framsókn missir nokkuð fylgi, fer úr 7,3 í 5,9 prósent og Píratar detta út af þingi.

Eftir stórt stökk í síðustu viku tapa Sósíalistar rúmu prósentustigi. Samkvæmt þessu myndi Samfylking fá 16 þingsæti, Viðreisn 15, Sjálfstæðisflokkurinn tíu, Miðflokkurinn níu, Flokkur fólksins sex, Framsóknarflokkurinn fjóra og Sósíalistar þrjá.

Eva Heiða Önnudóttir stjórnmálafræðingur segir Samfylkinguna hafa verið í kringum 20 prósent í margar vikur. Fall síðustu viku gæti tengst máli Þórðar Snæs en gæti líka ekki tengst því.

Hún segir Framsókn líklega ekki í hættu. Sögulega hafi flokkurinn verið vanmetinn í skoðanakönnunum og hafi fengið meira út úr kosningum. Þegar litið sé á skiptingu atkvæða eftir kjördæmum sé þó áhugavert að formaður flokksins, Sigurður Ingi Jóhannsson, gæti verið í hættu að ná ekki inn á þing.

Sigurður Ingi í mögulegri hættu

Samkvæmt könnun Maskínu er Framsóknarflokkurinn með mest fylgi á Norðurlandi, eða 11,7 prósent, en minnst í Reykjavík, eða 3,5 prósent. Á Suðurlandi, í kjördæmi Sigurðar Inga, mælist flokkurinn í nýjustu könnuninni með 9,4 prósent. Með í þeim tölum er líka fylgi flokksins á Reykjanesi.

Píratar detta út af þingi samkvæmt könnuninni og Eva Heiða segir þeirra fylgi ekki haggast. Samkvæmt könnun Maskínu er flokkurinn með 4,3 prósenta fylgi. Mest er fylgið í Reykjavík en er þó aðeins um 6 prósent og 5,7 prósent í nágrannasveitarfélögum. Utan höfuðborgarsvæðisins mælast Píratar með 0,6-2,7 prósenta fylgi.

„Þeir hafa yfirleitt verið ofmetnir í könnunum og ef maður á að byggja á því verður maður að segja að þeir séu í mikilli fallhættu,“ segir Eva Heiða.

Fleiri flokkar séu á mörkunum, eins og Sósíalistaflokkurinn og Vinstri græn. Sá síðarnefndi er í heildina með 3,1 prósenta fylgi. Ef litið er til kjördæma ná þau aðeins í einu að vera yfir fimm prósentum og það er á Norðurlandi þar sem flokkurinn mælist með 6,9 prósenta fylgi.

Eva Heiða segir flokkinn ekki hafa verið van- eða ofmetinn hingað til. Hún verði líklega að „éta hattinn sinn“ varðandi fyrri fullyrðingar um að flokkurinn eigi fylgi inni. Fylgið hafi ekki haggast síðustu vikur og geri það líklega ekki. Flokkurinn gæti náð inn kjördæmakjörnum fulltrúa á þing.

Sósíalistaflokkurinn mælist með mest fylgi í Reykjavík, eða 8,2 prósent, og svo um fimm prósent á Vesturlandi og Vestfjörðum og á Austurlandi.

Gætu kosið strategískt

Eva Heiða segir að það hafi verið talað um það hingað til að Íslendingar kjósi ekki taktískt í alþingiskosningum. Það gæti þó verið að breytast samhliða því að flokkunum sé að fjölga.

„Því fleiri flokkar sem eru á mörkunum þá getur það ýtt undir strategíska kosningu, það er að segja, ef fólk vill kjósa einhvern sem á möguleika á að fara á þing.“

Hvað varðar næstu ríkisstjórn segir Eva Heiða að miðað við þessar niðurstöður væri auðveldast fyrir Samfylkingu, Viðreisn og Sjálfstæðisflokk að mynda sterka ríkisstjórn en það gæti líka verið fjögurra flokka stjórn. Samfylkingin og Viðreisn geti líklega myndað ríkisstjórn saman en þurfi með sér einn eða tvo flokka.