Kunna ekki að slaka á og heyrðu í Svölu Björg­vins

„Við slökum ekkert á. Við kunnum það ekki, hausinn er á milljón allan tímann. Ég er ekki gæi sem chillar,“ segir Eyþór Aron Wöhler hlæjandi í samtali við Vísi. Hann skipar annan helming dúósins HúbbaBúbba ásamt Kristali Mána Ingasyni. Þeir hafa vakið ótrúlega athygli á samfélagsmiðlum, ekki síst TikTok en varla er hægt að skoða miðilinn án þess að heyra lög þeirra.

Létu ekki fyrstu jólin framhjá sér fara

„Við ákváðum að keyra vel á þetta fyrir þessi jól. Hljómsveitin var stofnuð fyrr á þessu ári þannig það má segja að þetta séu fyrstu jól okkar Kristals saman,“ segir Eyþór Aron. Hann segir þá félaga fyrst og fremst hafa viljað gera lög sem gætu staðist tímans tönn og slegið í gegn.

„Við urðum þess vegna að fá Svölu með okkur í lið, enda er hún náttúrulega jólageitin. Flestir hlusta auðvitað á þessi gömlu klassísku jólalög og þá var eiginlega óhjákvæmilegt að leita til alvöru reynslubolta til þess að ná í gegn og vonandi ná að festa lögin í sessi um jólin hjá fjölskyldum landsins. Sumir eru nefnilega þreyttir á Mariuh Carey, þó það eigi reyndar ekki við um mig,“ segir Eyþór hlæjandi.

Þrjú lög eru á smáskífunni, tvö með Svölu og það þriðja með Karlakóri Kjalnesinga. Eyþór segist ekki halda vatni yfir kórnum. „Þvílíkir gullbarkar og heiður að vinna með þessum hópi. Við erum óttalegir guttar þannig það er frábært að fá svona þroskaða menn okkur til liðsinnis. Einkunnarorð kórsins er metnaðurfullur léttleiki og passar það vel við okkar lífsýn. Það öskrar ekkert jafn mikið jól og áttatíu manna kór, það er bara þannig.“

Nýr kokteill, nýtt myndband, ný bók

Eyþór Aron hefur í nógu að snúast en ekki nóg með að hann fari mikinn í HúbbaBúbba heldur er hann líka nýbúinn að gefa út aðra útgáfu af Frasabókinni sem hann skrifaði og gaf fyrst út í fyrra. Þá stefna þeir félagar á að gefa út tónlistarmyndband með Svölu og ætla að frumsýna það á þriðjudagskvöld kl. 20:00.

„Þetta verður fjórfalt frumsýningarpartý, við ætlum að kynna nýjan HúbbaBúbba kokteil á La Trattoria, Frasabókina, TikTok myndband og nýtt tónlistarmyndband,“ segir Eyþór en hvernig í ósköpunum hefur hann tíma í þetta allt?

„Eins og ég sagði áðan, þá slaka ég aldrei á,“ segir hann hlæjandi. „Svo má ekki gleyma því að ég er líka í háskólanámi. Ég er búinn að vera járnaður í stólinn í allan dag í ritgerðarskrifum. En það eru fórnir í þessu, ég sé fjölskylduna ekki nærri því jafn oft og ég ætti að gera,“ segir Eyþór í gríni.

Þeir félagar ætla svo að fylgja plötunni eftir í desember. Félagi þeirra tónlistar- og knattspyrnumaðurinn Logi Tómasson betur þekktur sem Luigi verður með tónleika í Gamla bíó þann 22. desember þar sem HubbaBubba kemur fram. „Þar verðum við auðvitað í essinu okkar og svo er aldrei að vita nema að við krullum ekki í einhverja góða jólatónleika.“