„Erum stórt fé­lag en ekki stórt lið“

Amorim tók við United 11. nóvember. Liðið tapaði sínum fyrsta leik undir hans stjórn á miðvikudaginn þegar það laut í lægra haldi fyrir Arsenal, 2-0. Amorim viðurkennir að Arsenal standi United framar um þessar mundir.

„Það er ljóst. Við erum stórt félag en ekki stórt lið,“ sagði Amorim á blaðamannafundi fyrir leikinn gegn Nottingham Forest á Old Trafford í dag.

„Við erum ekki eitt af bestu liðunum í deildinni. Við verðum að segja það og hugsa það skýrt,“ sagði Amorim sem veit að það eru ávallt gerðar miklar væntingar til United.

„Áður fyrr var liðið okkar kannski númer eitt í deildinni. Svo þarna höfum við vandamál. Við verðum að einbeita okkur að litlu smáatriðunum og svo munum við bæta okkur sem lið.“

Síðusut ár hafa leikmenn United verið sakaðir um að leggja sig ekki nógu mikið fram í leikjum. Amorim segir að það verði ekki í boði hjá sér.

„Ef við viljum vinna ensku úrvalsdeildina þurfum við að hlaupa eins og óðir hundar. Jafnvel þótt þó sért með besta byrjunarlið í heimi vinnur það ekkert án þess að hlaupa,“ sagði Amorim.

United er í 13. sæti ensku úrvalsdeildarinnar en aðeins þremur stigum á eftir andstæðingum dagsins, Forest, sem er í 7. sætinu.