Antonio búinn í að­gerð

Antonio var fluttur með hraði á spítala eftir að hafa lent í alvarlegu bílslysi í gær. West Ham greindi svo frá því síðdegis að hann væri með meðvitund og gæti tjáð sig.

Í dag tilkynnti West Ham svo að Antonio væri búinn í aðgerð vegna fótbrots. Hann verður undir eftirliti á spítala næstu daga.

Í tilkynningunni er Antonio óskað skjóts bata. Þá þakkar West Ham fyrir stuðning fótboltafjölskyldunnar síðan fréttir af slysinu bárust.

Ljóst er að Antonio verður frá keppni í einhvern tíma. Hann hefur leikið með West Ham frá 2015 og er markahæsti leikmaður liðsins í ensku úrvalsdeildinni með 68 mörk.