„Ég tek bara ekkert mark á því“

Dregur hlutleysi Henrys í efa

Í kvöldfréttum Stöðvar 2 í gær sagði Henry að hann teldi margt bogið við leyfisveitingarferlið, og að nýr ráðherra málaflokksins myni líklega leita allra leiða til að ógilda leyfið. Vilhjálmur tekur ekki undir þetta.

„Grundvallaratriðið er það að það eru til lög um hvalveiðar og það er í hvívetna verið að fara eftir þeim. Þeir aðilar sem hafa verið að tjá sig núna að undanförnu, þau Henry og Katrín, þetta eru einir hörðustu andstæðingar hvalveiða á Íslandi. Það liggur fyrir að Henry er í fagráði sem skilaði áliti til fyrrverandi matvælaráðherra. Miðað við ummæli hans um veiðar og vinnslu á hvalaafurðum, þá má draga stórlega í efa það hlutleysi sem fólk í fagráði á að gæta,“ segir Vilhjálmur Birgisson, formaður Verkalýðsfélags Akraness.

Katrín hafi klappað hæst þegar vertíðin fór í vaskinn

Í hádegisfréttum Bylgjunnar í dag sagði Katrín svo ákvörðunina ekki í samræmi við stjórnskipunarvenjur, og að hún væri til marks um spillingu. 

Vilhjálmur segir ljóst að ákvörðunin standist lög, en að Katrín tali á öðrum nótum því hún sé einn harðasti andstæðingur hvalveiða í landinu.

„Hún hefur tjáð sig grimmt um það. Hún hefur líka verið einn harðasti stuðningsmaður þess að hér sé tekin upp ný stjórnarskrá, vegna þess að sú sem er við lýði í dag sé ekki að verja okkur nógu vel. Hún var nánast með standandi lófaklapp þegar fyrrverandi matvælaráðherrar brutu gegn stjórnarskrá, að mati Umboðsmanns Alþingis, með því að fresta og banna hvalveiðar árið 2023 og 24. Mér finnst gæta mikillar hræsni í málflutningi þessa fólks.“

Útflutningstekjur og lífsviðurværi undir

Vilhjálmur segist vilja halda þessum sjónarmiðum til haga, til varnar hagsmunum félagsmanna sinna. 

„Ég er að verja lífsafkomu 200 fjölskyldna. Ég vil líka minna á að Hvalur hf. hefur frá árinu 2010 skilað 21 milljarði núvirt í útflutningstekjur frá 2010. Hvalur greiðir 1,2 milljarða í laun til starfsmanna yfir hávertíðina. Hér er um gríðarlega hagsmuni fyrir okkur Akurnesinga að ræða, og nærsamfélögin.“

Vilhjálmur segir það mega vera lýðum ljóst að til þess að standa megi undir velferðarkerfi hér á landi þurfi verðmætasköpun að geta átt sér stað. 

„Tek bara ekkert mark á því“

Sjálfvirk framlengin leyfisins um eitt ár er nýmæli, og hefur aldrei fyrirfundist áður í leyfi eins og því sem Bjarni veitti Hval, líkt og Katrín nefndi í hádegisfréttum Bylgjunnar í dag. Spurður hvort ekki sé að finna málefnalegheit í gagnrýni á slíkt þvertekur Vilhjálmur fyrir það. 

„Ég tek bara ekkert mark á því. [Katrín] var með standandi lófaklapp þegar fólk var mætt til vinnu árið 2023 og vertíðin var blásin af með ólöglegum aðgerðum fyrrverandi matvælaráðherra. Það fannst henni bara í góðu lagi. Núna talar hún um spillingu og lélega stjórnsýslu. Það er léleg stjórnsýsla að fara ekki eftir þeim lögum sem eru í gildi. Öll fyrirtæki verða að hafa fyrirsjáanleika til þess að geta keypt aðföng, ráðið mannskap, undirbúið skipin og svo framvegis.“

„Engin atvinnustarfsemi getur þrifist á Íslandi ef hún hefur ekki fyrirsjáanleika inn í framtíðina. Það er útilokað mál,“ segir Vilhjálmur að lokum.