Emelíu sýnt mikið traust og samningurinn fram­lengdur: „Við sáum gæðin í sumar“

Emelía sleit krossband á æfingu í haust, gekkst undir aðgerð og hefur verið í endurhæfingu síðan. Á síðasta tímabili, sem var hennar fyrsta í dönsku deildinni, spilaði hún sjö leiki og skoraði eitt mark. Félagið hefur mikla trú á henni fyrir framtíðina.

„Við sáum gæðin í sumar sem Emelía býr yfir, áður en meiðsli settu strik í reikninginn. Hún mun koma sterk til baka á nýju ári. Við sáum hvað hún leggur hart að sér og býr yfir sterkum karakter, við höfum ekki efast í eina sekúndu um að hún muni snúa til baka sem enn betri leikmaður. Þess vegna hefur það verið forgangsatriði hjá okkur að sýna henni traust og trú á hennar hæfileikum,“ sagði yfirmaður íþrótta hjá HB Køge, Dennis Bauer.

Emelía er uppalin hjá Gróttu en lék einnig með unglingaliðum Ballerup-Skovlande í Danmörku. Hún spilaði tólf leiki í næstefstu deild með Gróttu áður en leiðin lág til Svíþjóðar árið 2022 og samningur var gerður við Kristianstad. Árið 2023 var hún lánuð til Selfossar og spilaði tíu leiki í Bestu deildinni þegar liðið féll. 

Hún samdi svo við HB Køge í desember 2023 og hefur heillast af félaginu, sem varð meistari í Danmörku árin 2021, 2022 og 2023.

„Ég er svo þakklát fyrir traustið sem félagið hefur sýnt mér og tel það segja mikið til um fólkið innan félagsins og hversu vel það er rekið, að hafa gengið frá samningi núna. Ég er ótrúlega ánægð hér og hlakka til að komast aftur inn á völl,“ sagði Emelía við undirritun samningsins.