Gengur í sunnan­storm og leiðinda­veður um allt land

Á vef Veðurstofunnar segir að víða verði rigning eða slydda og hiti verður á bilinu eitt til átta stig. Gular og appelsínugular viðvaranir taka gildi í morgunsárið.

„Síðdegis verður lægðin komin norður fyrir land, þá gengur í suðvestan og vestan 18-28 m/s og það kólnar með éljum eða snjókomu, en styttir upp um landið austanvert. Hvassast í vindstrengjum norðanlands.

Um kvöldmatarleytið dregur úr vindi sunnan heiða, og fyrir norðan fer veðrið að ganga niður undir miðnætti.

Það má því búast við leiðindaveðri í flestum landshlutum í dag og viðvaranir hafa verið gefnar út. Veðrið verður verst fyrir austan fram eftir degi og svo á norðurhluta landsins seint í dag, og þar eru appelsínugular viðvaranir í gildi,“ segir á vef Veðurstofunnar.

Gular og appelsínugular viðvaranir taka gildi, fyrst austantil, nú í morgunsárið en milli 15 og 19 verða viðvaranir í gildi um allt land. Síðasta veðurviðvörunin er í gildi á norðaustanverðu landinu til miðnættis.

„Suðvestan- og sunnanátt á morgun, allhvass vindur eða strekkingur og éljagangur, en bjart að mestu um landið norðaustanvert. Vægt frost. Bætir heldur í vind annað kvöld.

Á miðvikudag nálgast næsta lægð úr suðvestri. Það hvessir þegar líður á daginn og hlýnar með rigningu, og um kvöldið er útlit fyrir sunnan storm eða rok víða um land.

Veðurhorfur á landinu næstu daga

Á þriðjudag: Suðvestan og sunnan 10-18 m/s og éljagangur, en bjart að mestu um landið norðaustanvert. Vægt frost. Bætir heldur í vind um kvöldið.

Á miðvikudag: Suðvestan 13-20 og él, en áfram þurrt norðaustanlands. Hvessir seinnipartinn og hlýnar með rigningu, víða sunnan 20-28 m/s um kvöldið.

Á fimmtudag: Sunnan 23-30 m/s um morguninn og talsverð rigning. Hiti 5 til 14 stig, hlýjast í hnjúkaþey norðaustanlands. Dregur síðan úr vindi og úrkomu, fyrst vestantil. Suðvestan 10-18 síðdegis og él, en styttir upp um landið norðaustanvert. Kólnar í veðri.

Á föstudag: Sunnan og suðvestan 10-18 og snjókoma eða él, en yfirleitt þurrt norðaustanlands. Hiti um eða undir frostmarki.

Á laugardag: Suðvestlæg átt og hlýnar með dálitlum skúrum eða éljum, en þurrt að mestu um landið austanvert.

Á sunnudag: Mild sunnanátt og væta með köflum, en yfirleitt þurrt á Norður- og Austurlandi.