Tollahækkunum gegn Kanada líka frestað

Þetta tilkynnti Justin Trudeau rétt í þessu. Samkvæmt BBC verður þessum tollahækkununum, sem átti að setja á kanadískar vörur sem fluttar eru til Bandaríkjanna, frestað um að minnsta kosti þrjátíu daga.

„Á meðan við vinnum saman,“ er haft eftir Trudeau. 

Donald Trump sagði skömmu áður að símtal hans og Trudeau hefði gengið vel. Þegar hann var spurður hvort tollarnir væru á leiðinni svaraði hann: „Fylgist með.“

Fyrr í dag var greint frá því að fyrirhuguðum tollahækkunum Bandaríkjanna gagnvart Mexíkó hefði líka verið frestað um einn mánuð.

Mikið hefur verið fjallað um þessar tollhækkanir Donalds Trumps, sem er nýkominn í embætti Bandaríkjaforseta á ný, en hann hefur talað um að beita tollum á mörg helstu viðskiptaríki Bandaríkjanna.