Björg­ólfur Guð­munds­son er látinn

Frá þessu er greint í tilkynningu frá aðstandendum. Björgólfur var einn umsvifamesti viðskiptamaður landsins á árunum fyrir bankahrunið og fjárfesti meðal annars í enska knattspyrnuliðinu West Ham.  

Í tilkynningunni kemur fram að Björgólfur hafi fæðst 2. janúar 1941, sonur hjónanna Kristínar Davísdóttur, húsmóður, og Guðmundar Ólafssonar, bílstjóra. 

„Björgólfur ólst upp á Framnesvegi í Vesturbæ Reykjavíkur í hópi fimm systkina. Hann stundaði íþróttir með KR og gekk í Melaskólann, Gagnfræðaskólann við Hringbraut og síðan Verslunarskóla Íslands þar sem hann útskrifaðist sem stúdent 1962.

Björgólfur stofnaði iðnfyrirtækið Dósagerðin hf. árið 1962 og var hann forstjóri þess til 1977 þegar hann var ráðinn forstjóri Hafskips hf. Gengdi hann því starfi ásamt stjórnarformennsku í ýmsum dótturfyrirtækjum félagsins erlendis til ársins 1986. Á árunum fram til 1991 starfaði hann einkum í Danmörku sem ráðgjafi í skiparekstri og sem forstjóri í eigin félagi Icestar. Hann var ráðinn forstjóri Gosan í Reykjavík 1991 og síðar Viking Brewery en félögin voru í eigu Pharmaco. 1995 gerist hann stjórnarmaður í Bravo Ltd. í Pétursborg í Rússlandi sem hann stofnaði m.a. í félagi við son sinn Björgólf Thor. Ásamt rekstri eigin fjárfestingarfélags Hansa hf. sinnti Björgólfur upp frá þeim tíma nær einvörðungu stjórnarsetu í fjölmörgum fyrirtækjum þar á meðal Bravo International, Pharmaco og Primex á Íslandi og Balkanpharma Ltd í Búlgariu. Hann stofnaði árið 2002 fyrirtækið Ólafsfell hf. sem sinnti útgáfumálum og varð síðar leiðandi fjárfestir í útgáfufélögunum Eddu og Árvakri,“ segir í tilkynningunni frá aðstandendum.

Björgólfur og Björgólfur Thor auðguðust mikið á rekstri Bravo í Rússlandi, sérstaklega eftir kaup Heineken á félaginu. Björgólfsfeðgar og Magnús Þorsteinsson fjárfestir keyptu svo um helmingshlut í Landsbankanum árið 2003 þegar bankinn var einkavæddur og tók Björgólfur þá við formennsku í bankaráði bankans og gegndi stöðunni allt fram að hruni bankans. Björgólfur óskaði árið 2009 eftir því að vera tekinn til gjaldþrotaskipta. 

Keypti West Ham og var formaður KR

Í tilkynningunni segir ennfremur að Björgólfur hafi verið formaður stjórnar Portusar hf. sem hannaði og hóf byggingu tónlistarhússins Hörpu. Hann hafi sömuleiðis verið aðaleigandi og formaður knattspyrnufélagsins West Ham í Lundúnum í Bretlandi 2006 til 2009 og verið heiðursforseti félagsins til dauðadags.

„Björgólfur sinnti alla tíð félags- og samfélagsmálum af miklum áhuga. Hann gegndi á yngri árum margvíslegum trúnaðarstörfum fyrir Sjálfstæðisflokkinn og var um tíma formaður Varðar. Hann var einn stofnanda SÁÁ og var formaður þeirra samtaka um árabil. Hann var einnig formaður knattspyrnudeildar KR á árunum 1998 til 2002. Þá var hann aðalræðismaður Búlgaríu á Íslandi um árabil. Björgólfur lét víða til sín taka á sínum ferli með margvíslegum stuðningi við velferðar-, mennta- og menningarmál m.a. með stofnun og rekstri Minningarsjóðs um Margréti dóttur sína. Honum var veitt árið 2005 fálkorðan fyrir framlag sitt til viðskipta og menningarmála.

Björgólfur gekk að eiga Þóru Hallgrímsson (28. janúar 1930 – 27. ágúst 2020) þann 14. júní 1963. Áttu þau saman fimm börn, Örn Friðrik Clausen (látinn), Hallgrím Björgólfsson, Margrét Björgólfsdóttur (látin), Bentínu Björgólfsdóttur og Björgólf Thor Björgólfsson. Barnabörn Þóru og Björgólfs eru ellefu og barnabarnabörn sömuleiðis ellefu,“ segir í tilkynningunni frá aðstandendum.