Víða all­hvasst og élja­gangur

Frá þessu segir á vef Veðurstofunnar. Það mun svo bæta heldur í vind í kvöld og má sömuleiðis reikna með vægu frosti í dag.

Gular viðvaranir tóku gildi á Suðurlandi og Faxaflóa frá miðnætti og verða í gildi á fyrrnefnda svæðinu til klukkan níu en fram til hádegis á því síðarnefnda.

Búist er við að élin verði dimm og að þeim fylgi lélegt skyggni og slæm akstursskilyrði. Veðrinu slotar svo um tíma en gular viðvaranir taka gildi á sama svæði í kvöld og standa fram til hádegis á morgun þegar bætir jafnvel í hríðina.

Um miðjan dag á morgun hefur síðan verið gefin út gul viðvörun fyrir gjörvallt landið þar sem spáð er sunnan illviðri sem á að vara fram á miðjan dag á fimmtudag. Þá spáir veðurstofan tuttugu til þrjátíu metrum á sekúndu, stormi, roki eða ofsaveðri. Það verður hinsvegar hlýtt um allt land og rigning, talsverð eða mikil á sunnan- og vestanverðu landinu. Útlitið er metið á þann veg að raskanir á samgöngum séu líklegar og útlit fyrir vatnavexti víða. Þá eru einnig taldar líkur á staðbundnu foktjóni og er fólk hvatt til að huga vel að lausamunum.

Veðurhorfur á landinu næstu daga

Á miðvikudag: Suðvestan 13-20 m/s og él, en að mestu bjart norðaustanlands. Hiti í kringum frostmark. Hvessir seinnipartinn og hlýnar með rigningu, víða sunnan 20-28 um kvöldið.

Á fimmtudag: Sunnan 23-30 um morguninn og talsverð rigning, en líklega hægari norðvestanlands. Hiti 5 til 14 stig, hlýjast í hnjúkaþey fyrir norðan. Dregur síðan úr vindi og úrkomu, fyrst vestantil. Suðvestan 10-18 síðdegis og él. Kólnar í veðri.

Á föstudag: Suðlæg átt, 8-15 og snjókoma eða él, en yfirleitt þurrt norðaustantil. Hiti um eða undir frostmarki.

Á laugardag: Fremur hæg suðvestlæg átt og dálítil snjókoma eða él, en léttir til um landið austanvert síðdegis. Frost 0 til 8 stig.

Á sunnudag og mánudag: Útlit fyrir suðlæga átt og rigningu með köflum, en yfirleitt þurrt á Norður- og Austurlandi. Hlýnar í veðri.