Appel­sínu­gular við­varanir taka gildi: Stormur og sums staðar ofsa­veður

Á vef Veðurstofunnar kemur fram að víða verði sunnan og suðvestan stormur, rok og sums staðar ofsaveður seint í dag og talsverð rigning. Úrkomuminna verður norðaustanlands.

„Hægari um tíma í nótt, en gengur aftur í sunnan storm eða rok í fyrramálið og áfram talsverð rigning. Dregur smám saman úr vindi og úrkomu, fyrst vestantil. Suðvestan allhvass vindur annað kvöld og kólnar með éljum.

Appelsínugular viðvaranir vegna vinds taka gildi alls staðar á landinu síðdegis. Nauðsynlegt er að tryggja lausamuni til að fyrirbyggja foktjón. Fólki er bent á að sýna varkárni og fylgjast með veðurspám. Ekkert ferðaveður er á meðan viðvaranir eru í gildi,“ segir á vef Veðurstofunnar.

Veðurhorfur á landinu næstu daga

Á fimmtudag: Sunnan 23-30 m/s um morguninn og talsverð rigning, en líklega hægari og snjókoma á Vestfjörðum. Hiti 1 til 14 stig, hlýjast í hnjúkaþey fyrir norðan, en svalast á Vestfjörðum. Dregur síðan úr vindi og úrkomu, fyrst vestantil, suðvestan 13-20 seinnipartinn og él. Kólnar í veðri.

Á föstudag: Suðlæg átt, 5-13 og snjókoma eða él, en úrkomulítið fyrir norðan. Hiti í kringum frostmark, en hiti 0 til 5 stig við suðurströndina.

Á laugardag: Suðvestan 3-10, en hvassari fyrripartinn norðvestantil. Víða dálítil snjókoma eða él af og til, en léttir til eystra síðdegis. Frost 0 til 8 stig.

Á sunnudag og mánudag: Sunnan 10-18 og rigning með köflum, en yfirleitt hægari og þurrt á Norður- og Austurlandi. Hlýnar í veðri.

Á þriðjudag: Útlit fyrir suðaustlæga átt og dálitla vætu sunnan- og vestanlands, en léttir til fyrir norðan. Milt veður.