Leggja til refsingar vegna fót­bolta­krakka­veiða í Dan­mörku

Ungt og efnilegt fótboltafólk er eftirsótt og ekki síst hjá stærri félögum sem sækja í krakka í grasrótarfélögum á þeirra svæði.

Væntingar eru til þess að það verði til regluverk hjá danska sambandinu sem kemur í veg fyrir ólögleg félagsskipti krakka átján ára og yngri.

Markmiðið er að verja þessa efnilegu fótboltakrakka fyrir ágengi frá umboðsmönnum og öðrum félögum. TV2 í Danmörku segir frá.

Danska knattspyrnusambandið hefur sett saman nýja reglugerð sem tekur á fótboltakrakkaveiðum í Danmörku. Uppeldisbætur og sölur á leikmönnum eru að búa til mikla peninga fyrir félögin í Danmörku og þá getur skipt miklu máli að vera komin með leikmennina þegar þeir eru sem yngstir.

Danska sambandið segir frá þessu stefnumáli sambandsins á miðlum sínum en fer þó ekki nákvæmlega yfir það hverjar þessar reglur séu.

Politiken fjallaði um vandamálið í mars í fyrra en þar var varað við þessari þróun. Tvö félög, AGF og FC Kaupmannahöfn, voru þar sökuð um að ganga hvað lengst í að komast ólöglega yfir efnilega leikmönnum úr grasrótarfélögum.

„Það er að gerast á hverjum degi að maður heyrir af tilraunum til að tæla fótboltakrakka til sinna félaga, jafnvel krakka sem eru ekki eldri en fimm eða sex ára,“ sagði Jesper Jacobsen, yfirmaður barna og unglingamála hjá danska sambandinu.

FCK og AGF neituðu bæði að þau hafi brotið reglurnar.

Fjöldi grasrótarfélaga sögðu aftur á móti sögu af tilraunum þar sem félögin hafi haft samband við foreldra krakkanna sem er ekki leyfilegt.