Blöskrar tíminn sem þing­menn verja í tappatuð og galla­buxur

Einar stingur niður penna á Vísi nú þegar þing hefur verið starfandi í nokkrar vikur eftir kosningarnar í nóvember. Þar er að finna marga nýja þingmenn sem Einar lýsir sem hluta af kraftmiklum hóp sem vísast vilji allir hag þjóðarinnar betri en fyrir komu þeirra á þingið.

„Ekki veitir af einbeitingu og þreki því verkefnin sem við blasa eru ærin. Það þarf þjóðarátak í samgöngum, heilbrigðismálum og skólamálum ef marka mátti umræðuna fyrir og eftir kosningar, að ekki sé minnst á húsnæðismál, aðgengi að lánakjörum á forsendum sem venjulegt fólk ræður við og fjölmargt fleira,“ segir Einar.

Hann staldrar við nýlegar umræður af þinginu.

„Þingheimur einhenti sér í störfin og fyrstu fréttir af húsnæðismálum voru deilur þingflokka Samfylkingar og Sjálfstæðisflokksins um hver ætti að vera í hvaða þingflokksherbergi. Kannski ekki beint það sem kjósendur höfðu í huga,“ segir Einar. Málinu lauk með því að ósáttur Sjálfstæðisflokkur missti herbergi sitt og gaf Samfylkingunni listaverk í innflutningsgjöf, bláan hval.

„Næsta mál snéri að því hvort þingmaður Viðreisnar þyrfti að fara úr gallabuxunum þegar hann mætti í vinnuna. Varla efst í huga kjósenda þegar gengið var til kosninga,“ segir Einar um gallabuxur Jóns Gnarr sem hefur meðfram þingstörfum sýnt fylgjendum sínum á samfélagsmiðlum hvar klósettið og matsalinn sé að finna á Alþingi.

„Þá var tekist á um það í fimm klukkutíma í síðustu viku á sama tíma og yfirvofandi var enn eitt kennaraverkfallið, hvort plastappar á einntota drykkjarmálum skyldu að vera áfastir eða ekki. Mitt svar við þeirri spurningu er reyndar afdráttarlaust já!“

Einar hefur sem plokkari varið löngum tímum á vetum úti og tínt rusl. Samkvæmt hans reynslu er mannfólkinu ekki treystandi fyrir lausum töppum á einnota drykkjarvörum.

„Einn ágætur þingmaður Sjálfstæðisflokksins lýsti því yfir að hann hefði misst lífsviljann við tilhugsunina um að þurfa að gangast undir þessa kvöð. Ef satt reynist verðum við heldur betur að spýta í lófanna í geðheilbrigðismálum og forvörnum vegna sjálfsvíga sem eru líka grafalvarleg vandamál,“ segir Einar.

Jón Pétur Zimsen fyrrverandi skólastjóri er þingmaðurinn sem um ræðir.

„Ég hef síðustu ár tekið þátt í því með stórum hópi fólks, að tína rusl úr umhverfinu okkar. Plasttappar er eitt algengasta ruslið sem finnst í umhverfinu okkar samkvæmt Ocean Conservancy. Ekki það að ég þurfi að leita langt yfir skammt til að sannfærast um það sem ég hef séð eigin augum. Fiskar og fuglar eiga til að rugla plasttöppum gjarnan saman við fæðu, sem getur valdið köfnun, meltingarvandamálum eða dauða.“

Áætlað sé að 100-150 milljónir tonna af plasti hafi nú þegar safnast saman í sjónum og um 8 milljónir tonna bætast við árlega. Plasttappar teljist meðal 10 algengustu rusltegundanna.

Fólk sé kosið á Alþingi til að bæta hag okkar allra. Ekki til þátttöku í ræðukeppnum á borð við Morfís.

„Flestir á Alþingi enda of gamlir til að skrá sig í slíka keppni. Ég óska öllum þingmönnum velfarnaðar í störfum sínum en nú er kosningabaráttan að baki. Nú þarf að taka á málum sem eru alvöru áskoranir. Sýnið öll, kæru þingmenn - og konur, að ykkur er treystandi til góðra verka og munið að Stóri plokkdagurinn er 27. apríl næstkomandi. Þá skulum við fara saman og tína tappa!“