Trúir ekki að menn loki fisk­vinnslu til að mót­mæla veiðigjöldum

Ríkisstjórnin kynnti áform um að hækka veiðigjald á sjávarútvegsfyrirtæki í vikunni og lýsti henni sem leiðréttingu á gjaldinu. Hækkunin gæti numið allt að tvöföldun á veiðigjaldinu í einhverjum tilvikum. Hagsmunasamtök þeirra hafa gagnrýnt áformin harðlega og fullyrt að atvinnugreinin standi ekki undir hærri gjöldum.

Gríðarleg viðbrögð við áformunum úr öllum áttum komu Hönnu Katrínu Friðriksson, atvinnuvegaráðherra, á óvart. Hún segist hafa fengið jákvæð viðbrögð frá einstaklingum og fyrirtækjum í öllum atvinnugreinum, einnig úr sjávarútvegi. Hækkunin sé langþráð skref þar sem nú eigi að taka tillit til raunverulegs aflaverðmætis.

Gagnrýnisraddir sem heyrst hafa um hækkunina hafa verið misjafnlega hófstilltar, að matiráðherrans. Ríkisstjórnin muni hlusta á umsagnir um áformin og taka tillit til þeirra áhyggna sem séu réttmætar.

Hins vegar telur ráðherrann þá sem fullyrða að fiskvinnsla flytjist úr landi ef veiðigjöldin verða hækkað skjóta yfir markið. Afkomutölur í bæði veiðum og vinnslu sýni að arðsemi þar sem sé töluvert yfir því sem þekkist í hagkerfinu almennt.

„Ég ætla ekki að standa hér og fullyrða að engum vinnslum verði lokað en það verður ekki vegna þessarar leiðréttingar. Það er þá vegna þess að menn eru einhvern veginn að láta í ljós óánægju sína með því að grípa til þessara aðgerða. Við því er sjálfu sér lítið að gera,“ segir ráðherrann.

Hefur malað handhöfum kvótans gull

Hugmyndir um að leggja á einhvers konar vinnsluskyldu á sjávarútvegsfyrirtækin til þess að knýja þau til að halda áfram að vinna fiskinn á Íslandi eru fjarri ráðherranum og þvert um geð.

„Ég ætla bara ekki að trúa því fyrr en á reynir að menn grípi til slíkra aðgerða til að láta í ljós óánægju sína með þessa leiðréttingu. Ég tel hana réttmæta. Ég tel hana sýna hófstillta hækkun á veiðigjöldum. Ég tel að allir eigi að geta vel við unað eftir þetta,“ segir Hanna Katrín.

Nýtingarréttur á fiskveiðiauðlindinni hefur malað rétthöfum hans gull, að sögn ráðherrans. Lögin um veiðigjöld séu áratuga gömul en þau eigi ekki aðeins að skila sér upp í kostnað ríkisins við atvinnugreinina heldur einnig að skila þjóðinni réttmætu afgjaldi af auðlindinni.

„Það er ekki svo, hefur ekki verið svo og nú erum við einfaldlega að leiðrétta það,“ segir atvinnuvegaráðherra.