Rose með þriggja högga for­ystu á Mastersmótinu

Rose lék mjög vel á Augusta vellinum í dag og endaði líka góðan dag á því að fá fugla á bæði fimmtándu og sextándu holunni.

Rose lék alls á 65 höggum eða sjö höggum undir pari. Rose fékk reyndar skolla á lokholunni en hafði þá náð átta fuglum á hringnum.

Rose hefur aldrei unnið Masters á ferlinum en tvisvar lent í öðru sæti, 2015 og 2017. Hann vann sitt fyrsta og eina risamót árið 2013 þegar hann vann Opna bandaríska mótið.

Rose er þremur höggum á undan þeim Corey Conners, Scottie Scheffler og Svíanum Ludvig Åberg sem allir léku á fjórum höggum undir pari. Scheffler er því að byrja titilvörn sína vel en hann vann Mastersmótið í fyrra.

Bandaríkjamaðurinn Bryson DeChambeau og Englendingurinn Tyrrell Hatton eru jafnir í fimmta sætinu á þremur höggum undir pari.

Norður Írinn Rory McIlroy gerði sig líklegan til að blanda sér í toppbaráttuna en hann var á fjórum höggum undir pari fyrir fimmtándu holuna. Það hrundi aftur á móti allt í lokin.

McIlroy gerði stór mistök á fimmtándu og kúlan endaði í vatninu. Hann fékk tvöfaldan skolla á holunni og var þá kominn tveimur höggum undir par. Hann fékk síðan annan tvöfaldan skolla á sautjándu holunni og endaði því hringinn á parinu.

Hinn 65 ára gamli Fred Couples lék fyrsta hringinn á einu höggi undir pari og varð með því næstelsti kylfingurinn á Mastersmótinu til að klára hring undir parinu. Couples er bata einum mánuði yngri en Tom Watson var þegar hann lék einnig á höggi undir pari árið 2015.

Mótið er sýnt á Stöð 2 Sport 4 og hefst útsending annað kvöld klukkan 19.00.