Baldur Sigurðsson heldur áfram að hita upp fyrir fótboltasumarið með þáttunum Lengsta undirbúningstímabil í heimi. Nú er komið að því að fara til Akureyrar og heimsækja lið Þór/KA sem endaði í fjórða sæti síðasta sumar.
Enginn lék betur í liðinu í fyrrasumar en landsliðskonan Sandra María Jessen. Hún hefur gengið í gegnum ýmislegt á ferlinum en eitt ár er líklegt til að standa upp úr.
Baldur rifjaði upp árið 2017 hjá henni. „2017 mér finnst vera svo magnað ár hjá þér. Hvað gerist hjá þér á þessu ári? Farðu aðeins yfir þetta ár. Þú meiðist, þú verður Íslandsmeistari og ferð á lokamót EM,“ sagði Baldur.
Honum var bara dauðasta alvara
„Árið byrjar á því að við fáum nýjan þjálfara. Donni mætir [Halldór Jón Sigurðsson] og mætir bara með læti. Það fyrsta sem hann segir við okkur á fundi er að við ætlum að verða Íslandsmeistarar,“ sagði Sandra María.
„Ég var svona, já, ok. Honum var bara dauðasta alvara og alveg steinviss í því að við ætluðum að klára tímabilið sem Íslandsmeistarar,“ sagði Sandra.
„Það tókst á endanum en svo lenti ég í smá bakslagi þegar ég er með landsliðinu á Algarve. Þá fékk ég loksins tækifæri í byrjunarliðinu og gekk bara vel. Lendi svo í því að stelpa í Noregi lendir framan á hnénu og ég slít aftara krossband,“ sagði Sandra.
Spilaði með aftara krossband slitið
„Það var mikil svartsýni að taka þátt í EM því það var sama ár. Síðan kem ég heim og hitti lækninn. Hann segir mér frá því að það séu leikmenn sem spili með aftara krossband slitið. Það sé ekki eins nauðsynlegt að fara í aðgerð. Bara passa að styrkja vel í kring og svona,“ sagði Sandra.
„Hann gaf mér smá gulrót að það væri möguleiki að komast á EM ef allt myndi ganga vel, ég myndi sinna endurhæfingunni vel og sleppa því að fara í aðgerð. Ég tók slaginn og prófaði það. Ég held að ég hafi verið farið að spila tveimur til þremur mánuðum seinna,“ sagði Sandra.
„Ég var ekki með landsliðinu í síðasta verkefninu fyrir EM. Ég hélt í vonina en var raunsæ á sama tíma að það myndi ekki takast,“ sagði Sandra.
Fór meira að segja að gráta
„Ég beið eins og allir aðrir og vissi það ekki fyrr en það kom í fjölmiðla að ég væri með í hópnum. Þetta var eitt af þessum stóru augnablikum sem ég mun aldrei gleyma. Ég held að ég hafi meira að segja farið að gráta og allt saman,“ sagði Sandra.
„Ég hafði líka reynslu af því áður að hafa slitið krossband því ég sleit fremra krossband 2014. Ég ætlaði mér að geta þetta,“ sagði Sandra.
Þátturinn um Þór/KA verður sýndur klukkan 18:05 á Stöð 2 Sport í kvöld.
