Snjó­koma eða slydda norðan- og austan­til

Á vef Veðurstofunnar segir að það verði snjókoma eða slydda með köflum á Norður- og Austurlandi, en að það muni draga úr ofankomu norðvestanlands með morgninum. Þó megi áfram búast við einhverjum éljum þar í dag.

„Sunnan heiða verður hins vegar þurrt að mestu. Hiti yfir daginn frá frostmarki norðaustantil upp í 9 stig við suðurströndina.

Keimlíkt veður á morgun, en snjókomubakki gengur inn yfir Austurland og þar má búast við talsverðri ofankomu fram eftir degi,“ segir í tilkynningunni.

Veðurhorfur á landinu næstu daga

Á miðvikudag: Norðaustan 8-15 m/s og dálítil él, en snjókoma á Austurlandi fram undir kvöld. Bjartviðri suðvestanlands. Hiti kringum frostmark, en að 8 stigum sunnan heiða yfir daginn.

Á fimmtudag (skírdagur): Norðan 8-13 og víða él, en yfirleitt þurrt sunnantil. Hiti nálægt frostmarki yfir daginn, en 1 til 6 stig sunnanlands.

Á föstudag (föstudagurinn langi): Fremur hæg breytileg átt og víða léttskýjað. Hlýnar lítillega.

Á laugardag: Hæg suðlæg eða breytileg átt og skýjað með köflum, en bjartviðri um landið austanvert. Hiti 0 til 8 stig yfir daginn, hlýjast suðvestantil, en næturfrost víðast hvar.

Á sunnudag (páskadagur) og mánudag (annar í páskum): Breytileg átt og bjart með köflum. Hiti breytist lítið.