„Kemur væntan­lega risa­stórt tóma­rúm“

Þetta sagði Hlynur Bæringsson sem mætti í settið hjá Körfuboltakvöldi eftir að hafa orðið Íslandsmeistari með Stjörnunni í gær. Fullkominn endir því þetta var hans síðasti leikur á ferlinum, spilaður á Sauðárkróki þar sem þessi 42 ára Grundfirðingur lék á sínu fyrsta körfuboltamóti árið 1995.

Hlynur var skiljanlega í miðjum tilfinningarússíbana þegar hann reyndi að svara spurningum Stefáns Árna Pálssonar og sérfræðinga hans sem hrósuðu Hlyni í hástert fyrir sitt einstaka framlag til íslensks körfubolta, eins og sjá má í spilaranum hér að neðan.

En hvað tekur svo við?

„Það kemur væntanlega risastórt tómarúm. Þetta er sjálfsmyndin manns. Allt sem ég hef gert. Fyrsta mótið mitt var einmitt hérna [á Króknum] haustið ´95. Nánast allt sem ég hef gert hefur snúist um þetta [körfubolta]. Alls staðar þar sem þú kemur ertu körfuboltamaðurinn Hlynur. Auðvitað verður það erfitt. Þetta móment og þessi stemning kemur aldrei aftur,“ sagði Hlynur.

Hann lék sinn fyrsta deildarleik 16. október 1997 og lauk ferlinum í gær, næstum 28 árum síðar, og benti Stefán Árni á þá sturluðu staðreynd að dómarinn Sigmundur Már Herbertsson hefði dæmt báða leikina.

Hlynur átti ríkan þátt í því að Stjarnan næði að vinna einvígið við Tindastól, 3-2, en var fyrir tímabilið allt eins undirbúinn fyrir það að vera í sáralitlu hlutverki. Hlynur segir það vissulega hafa verið „bónus“ að taka svo virkan þátt í að landa titlinum, og var minntur á skemmtileg ummæli sín frá því síðasta haust.

„Ég fann fyrir tímabilið að það væri erfitt að gíra sig í þetta og ég var tilbúinn að fara í eitthvað minna [hlutverk]. Ég bjóst ekki við því að spila svona mikið. Auðvitað er extra sætt að vera inni á vellinum en ég var tilbúinn í hitt, hvernig sem ég gat hjálpað, og það komu leikir í vetur þar sem ég spilaði tíu sekúndur eða eina mínútu. Það að fá að vera inná og spila rullu, þó að hún sé breytt, ég bjóst ekkert við því,“ sagði Hlynur.

Stjörnumenn höfðu verið afar nálægt því að landa sigri á Króknum í fyrsta leik einvígisins en náðu honum svo í oddaleiknum í gær, eftir að hafa unnið báða heimaleiki sína:

„Við vorum ofboðslega vel undirbúnir fyrir þessa seríu. Það er ekki hægt að líkja þessu saman við þegar maður var að byrja í þessu. Við gerðum allt, vorum í einhverjum súrefnisklefa og það var bara allt upp á tíu. Það hefði ekki komið mér á óvart þó við færum í þyrlu í leikina, það var svo mikið lagt í undirbúninginn. Fólkið sem stóð í þessu á rosalega stóran part í þessu.

Við trúðum á þetta. Við trúðum að við værum betra lið, betri liðsheild, og að það myndi skila okkur einhverju,“ sagði Hlynur og kvaðst hafa liðið „fáránlega vel“ inni á vellinum, laus við allt stress sem hefði getað myndast á árum áður.