Kaupa Delap og eru í við­ræðum við Sancho

Delap átti virkilega fínt tímabil með Ipswich Town þó svo að liðið hafi fallið. Skoraði hann alls 12 mörk í ensku úrvalsdeildinni ásamt því að gefa tvær stoðsendingar. Delap er falur fyrir 30 milljónir punda og fjöldi liða á eftir honum vegna verðmiðans. Hann virtist vera á leið til Manchester United en hætti við.

Nú greinir Sky Sports frá því að Chelsea sé að ganga frá kaupunum á þessum 22 ára framherja. Félagið vill fá hann sem strax svo Delap verði löglegur þegar HM félagsliða hefst um miðjan næsta mánuð.

Þá virðist sem mark Sancho í úrslitum Sambandsdeildar Evrópu hafi sannfært forráðamenn félagsins að festa kaup á honum. Sancho var á láni hjá Chelsea frá Man United en lengi vel virtist sem Chelsea væri frekar til í að borga sekt heldur en að standa við samninginn sem það gerði við Man Utd.

Sky Sports greinir frá því að Chelsea sé í samningaviðræðum við Sancho en hann þyrfti þá að samþykkja samning sem passar inn í launastrúktúr félagsins. Hann mun kosta Chelsea 25 milljónir punda en Sky Sports greinir ekki frá því hvort leikmaðurinn þurfi að taka á sig launalækkun.

Chelsea endaði tímabilið af krafti. Ásamt því að tryggja sér Meistaradeildarsæti á næstu leiktíð þá vann það frábæran 4-1 sigur á Real Betis í úrslitum Sambandsdeildarinnar. Það verður þó stutt sumarfrí þar sem HM félagsliða hefst 15. júní. Þar er Chelsea í riðli með ES Tunis, Flamengo og León.