Þór dregur liðið úr keppni í efstu deild

Fyrr í dag greindi Vísir frá því að Stjarnan hafi sótt tvo lykilleikmenn í liði Þórs á síðasta tímabili, Madison Sutton og Evu Wium Elíasdóttur. Þá hafði áður verið greint frá því að þjálfari liðsins á síðasta tímabili, Daníel Andri Halldórsson, myndi hætta störfum og taka við KR.

Þór sótti nýja þjálfara fyrir liðið en sér ekki fram á að geta bætt upp leikmannamissinn, án þess að fullnýta útlendingakvótann sem stjórninni finnst ekki forsvaranlegt.

„Nýverið var tilkynnt um ráðningu á tveimur gífurlega færum þjálfurum [Ricardo González og Lidia Mirchandani] fyrir kvennaliðið með það í huga að byggja upp kvennalið og yngri flokka okkar til framtíðar. Með akkúrat þessi sjónarmið, uppbyggingu og framtíðarhugsun teljum við hag kvennaliðs okkar betur borgið í 1. deild þar sem betri tækifæri gefast til þess að gefa ungum og efnilegum leikmönnum tækifæri…

Okkur í stjórn KKD finnst ekki forsvaranlegt að þurfa a.m.k. næstu 3-4 árin að halda úti liði sem að mestu yrði byggt á því að fullnýta útlendingakvótann sem leyfður er hverju sinni…“ segir í tilkynningunni sem Þór sendi frá sér.