Skriðuhætta geti skapast á ó­lík­legum stöðum

Fram kemur á heimasíðu Veðurstofunnar að í nótt hafi víða snjóað til fjalla á annesjum á norðanverðu og austanverðu landinu. Hlýrra var á Austfjörðum en snjólínan var þar við um 400 metra hæð yfir sjávarmáli. Úrkoman féll mest til fjalla en mesta mælda úrkoman á láglendi síðasta sólarhring var á Bakkagerði í Borgarfirði eystra þar sem mældust hátt í 37 millimetrar.

Leysingar byrjuðu í morgun

Samkvæmt veðurspánni er ekkert lát á úrkomunni og búast má við mikilli uppsafnaðri úrkomu næstu tvo daga, sérstaklega á norðanverðu landinu í kringum Flateyjarskaga og Tröllaskaga. Eftir hádegi í dag mun rigna á láglendi en snjóa efst í fjallatoppum þegar hlýnar og má því búast við miklu afrennsli á þeim stöðum þar sem úrkoman verður mest.

Gera má ráð fyrir mikilli rigningu nyrst á Tröllaskaga og Flateyjarskaga í dag og fram á helgi, en aðfaranótt fimmtudags mun draga eitthvað úr ákefðinni. Eins má búast við talsverðri úrkomu á Skaga, Vatnsnesi, Ströndum og á Tjörnesi næstu sólarhringa. Á þessum slóðum verður hætta á skriðuföllum og vatnavöxtum næstu daga, og hefur verið gefin út úrkomuviðvörun fyrir þessi svæði. 

Á norðanverðum Austfjörðum má búast við úrkomu, en hún verður mest í grennd við Vopnafjörð, Borgarfjörð eystri og Mjóafjörð. Spáin gerir ráð fyrir minni úrkomu á Seyðisfirði og Eskifirði, en þó má búast við þónokkurri úrkomu á þeim slóðum. Grunnvatnsmælar á Seyðisfirði og Eskifirði gefa til kynna að grunnvatnsstaða sé lág. Líkt og á Norðurlandi snjóaði í nótt, en leysingar byrjuðu í morgun og mun snjólínan hækka fram eftir degi.

Hætta geti skapast á ólíklegum stöðum

Úrkoman austast á fjörðunum mun vara skemur en á Norðurlandi, en gera má ráð fyrir því að dragi hratt úr úrkomuákefðinni skömmu eftir hádegi miðvikudaginn 4. júní, þó styttir ekki upp fyrr en seinna um daginn. Þar sem uppsöfnuð úrkoma er talsverð á svæðinu er varað við auknum líkum á skriðuföllum.

Í miklum vatnsveðrum sem þessum geti verið erfitt að spá fyrir um staðbundna úrkomu í flóknu fjarðarlandslagi, og því geti verið erfitt að meta hvar skriðuhættan er mest. Snöggar breytingar í hitastigi og vindátt geti valdið því að aðstæður breytast snögglega, og hætta geti skapast á ólíklegum stöðum.

Fram kemur á vef Veðurstofunnar að skriðuvaktin muni fylgjast náið með aðstæðum næstu sólarhringa en til að geta lagt betur mat á aðstæður sé mikilvægt fyrir vaktina að fá tilkynningar um skriðuföll. Hægt er að hafa samband við skriðuvaktina í síma 522-6000.