SFF hafna á­sökunum bif­reiða­eig­enda

Greint var frá því í morgun að Félag íslenskra bifreiðaeigenda (FÍB) hefði kvartað til Samkeppniseftirlitsins (SKE) undan ummælum hagfræðings Samtaka fyrirtækja í fjármálaþjónustu (SFF). FÍB sakaði samtökin um tilraun til að draga úr samkeppni á tryggingamarkaði eftir að hagfræðingurinn lýsti í viðtali viðvarandi tapi af vátryggingastarfsemi á Íslandi.

„Kvörtunin kemur okkur hjá SFF á óvart,“ er haft eftir Heiðrúnu Jónsdóttur, framkvæmdastjóra SFF, í yfirlýsingu sem SFF sendi fréttastofu. SFF hafna þar alfarið að samtökin hafi hvatt til aðgerða sem hafi skaðleg áhrif á samkeppni eða brotið samkeppnislög.

Málið varðar meintar rangfærslur Gústafs Steingrímssonar, hagfræðings SFF, í viðtali í Morgunblaðinu. Hagfræðingurinn sagði m.a. að meðalafkoma íslenskra vátryggingafyrirtækja af vátryggingahluta starfseminnar, utan líftrygginga, hafi verið neikvæða að meðaltali á sjö ára tímabili á árunum 2017-2023.

FÍB taldi fullyrðingar hagfræðingsins rangar eða villandi og vísaði til gagna frá Seðlabanka Íslands um stöðu og afkomu vátryggingastarfsemi tryggingafélaga. SFF hafnar því og „þykir miður að FÍB hafi valið að setja mál sitt fram með þessum hætti,“ segir í yfirlýsingunni.

SFF benda á að umfjöllunin sem FÍB vísar til hafi falið í sér samantekt á tölfræði um tryggingarekstur innan einstakra Evrópuríkja frá Evrópsku vátrygginga- og lífeyrissjóðaeftirlitsstofnuninni (EIOPA) sem hafi að miklu leyti áður verið birt opinberlega hér á landi og sé öllum aðgengileg á vef EIOPA.

Í viðtalinu við hagfræðing SFF væri ekkert vikið að verðlagningu, þjónustustigi, vöruframboði eða kjörum vátryggingafélaga, eða samkeppni milli þeirra að öðru leyti. 

„Þá er í greininni ekki að finna nein skilaboð eða hvatningu til vátryggingafélaga um tiltekna háttsemi eða aðgerðir,“ er enn fremur haft eftir Heiðrúnu. Skýrt komi fram í fréttinni að líftryggingar séu undanskildar í tölfræði EIOPA en með því fæst yfirlit yfir afkomu skaðatrygginga milli Evrópulanda.

Alþjóðleg hefð sé fyrir því að skipta tölfræði um vátryggingar í annars vegar líftryggingar og hins vegar samtölu allra annarra vátrygginga rétt eins og EIOPA tölurnar gera.