Fjórar týpur af yfir­mönnum sem eru sjálfir að drukkna í vinnu

Harvard Business Review (HBR) hefur sérstaklega bent á bók sem fjallar um þetta og ber það skemmtilega heiti: Leaders Shouldn’t Try to Do It All. Í umfjöllun HBR segir að bókin fjalli um þá ótrúlegu algengu gryfju stjórnenda að vera hreinlega að drukkna í vinnu sjálfir; Frekar en að velja vel hvaða verkefni þeir eiga að fókusera á og sinna ekki öðru.

Greinahöfundur Forbes hefur líka tekið saman skemmtilegar lýsingar á þeim fjórum týpum sem sagðar eru einkenna stjórnendur sem eru einfaldlega að drukkna í vinnu.

Það sem þessar týpur eiga þó allar sammerkt er að þeir ELSKA vinnuna sína. Og eru rosalega góðir í því sem þeir gera.

Spurningin er hins vegar: 

Ef yfirmaðurinn er sjálfur að drukkna í vinnu, hvenær hefur hann þá tíma til að styðja við starfsmenn sína? Sem mögulega líður eins og er alltaf undir sömu pressunni; Að vera að drukkna í vinnu.

Við skulum sjá hvaða týpur við þekkjum úr okkar nærumhverfi:

1. Rokkstjarnan

Þessi yfirmaður hefur eiginlega alltaf átt sviðsljósið í vinnunni; Svo öflugur er viðkomandi! Og þessi yfirmaður er alltaf að. Svo duglegur og afkastamikill er þessi yfirmaður að oft er vinnuframlagið hans tekið sem sjálfsagður hlutur; Það gera einfaldlega allir ráð fyrir að eitthvað svakalegt komi alltaf frá þessum; Alltaf og svo stöðugt að þeir gera langtum meira en þeir þyrftu að gera.

2. Sá sítengdi

Þetta er yfirmaðurinn sem byrjar daginn á því að lesa tölvupósta, tékkar á tölvupóstinum síðan aftur þegar verið er að borða morgunmatinn, svarar um hæl, jafnvel þegar verið er að horfa á sjónvarpið á kvöldin eða hlaupa á hlaupabrettinu í ræktinni. Það er einfaldlega hægt að treysta því að þessi yfirmaður sé alltaf til staðar; Svari öllu og bregðist alltaf fljótt við. Alla daga, allan ársins hring, alls staðar.

Og því meira sem tæknin þróast, því tengdari verður þessi yfirmaður. Því samskiptaleiðirnar eru einfaldlega svo margar og fjölbreyttar.

3. Sá góði

Hérna er síðan yfirmaðurinn sem er svo góður í sér að hann segir alltaf Já. Á einfaldlega erfitt með að segja Nei. Að hluta til vegna þess að undirliggjandi er ákveðinn ótti um að verða þá ónauðsynlegur eða í það minnsta ekki eins mikilvægur.

Þessi yfirmaður er líka alltaf til staðar; Enda að vinna mjög mikið, segjandi öll þessi Já…

4. Sá kappsami

Loks er það sá kappsami. Sem er einfaldlega drifinn áfram af ákveðinni ástríðu; Metnaðarfullur og kröfuharður á sjálfan sig. Þetta er yfirmaðurinn sem velur sér sérstaklega verkefni sem hann hefur mikinn áhuga á. En það er ekki nóg; Því svo mikið elskar þessi týpa vinnuna að hann nýtir nánast alla sína orku og krafta í þágu hennar.

Góðu ráðin fyrir yfirmennina

Það er ekkert ólíklegt að margir hafi kinkað kolli við lesturinn. Enda þekkja flestir yfirmenn, eða hafa þekkt yfirmenn, sem elska vinnuna sína svo mikið að þeir eru einfaldlega alltaf að.

Öll leiðtogafræði tala hins vegar fyrir því að meira ávinnist af því að leiðtogi leiði; Að stjórnandi stjórni. Að yfirmaðurinn sé nokkurs konar fyrirliði hópsins.

Hérna koma því nokkur ráð fyrir fyrrgreinda yfirmenn. En þau eiga það sameiginlegt að breyta ákveðnu hugarfari.

Rokkstjarnan – breytt hugarfar:

Þú veist fullvel að þú getur svo sannarlega unnið öll þessi verkefni sjálfur. Og ert góður í þeim. En þýðir þetta þá að þú getir leiðbeint og þjálfað aðra í að verða eins góðir? Skoðaðu vel í hvað athyglin þín og orka er að fara.

Sá sítengdi – breytt hugarfar:

Eitt er að geta gert allt en annað er að eiga að gera allt. Þessu hugarfari þarft þú að breyta og því fylgir að finna hinn gullna meðalveg í því hvenær þú ert að skoða vinnutengd mál og hvenær ekki. Mundu að þú átt að stjórna tækninni sem þú notar, ekki tæknin þér. Góð æfing gæti til dæmis falist í því að leggja símann frá þér um tíma og telja hversu oft þig langar til að grípa í hann til að sjá hvað er í gangi.

Fyrir þessa aðila er gott að skipuleggja tíma í dagskránni til að vinna í verkefnum eða taka fundi þar sem þú skoðar ekki tölvupósta eða önnur skilaboð á meðan, svarar ekki símtölum eða öðrum erindum á meðan og svo framvegis.

Sá góði – breytt hugarfar:

Góð leið til að æfa sig í að segja Nei er að byrja smátt; Veldu þér eitthvað eitt sem þú ætlar ekki að gera og munt segja Nei við. Útskýrðu ákvörðunina þína því þegar fólk áttar sig á því að þú ert fyrst og fremst að segja Nei til að gera þitt besta, skilur fólk það. Mælt er með því að þessi týpa skoði það líka í einkalífinu að segja oftar Nei við fólk.

Sá kappsami – breytt hugarfar:

Svona drifkraftur og ástríða getur komið mörgu til leiða. En er aldrei góð leið til lengdar. Að keyra sig svona áfram eykur einfaldlega líkur á að einn daginn brennir þú út. Sem þú vilt ekki.

Þess vegna er mikilvægt að þú lærir að setja þér og áhuganum á vinnunni mörk: Að úthluta þér tíma í einkalífinu og utan vinnu sem einfaldlega tryggir að þú kúplir þig algjörlega frá þannig að með tímanum náir þú að vera aðeins í vinnunni þann tíma sem þú átt að vera í vinnunni. En þess utan sértu það ekki (ekki heldur í huganum).