Misstu sinn besta mann en fóru létt með undanúrslitaleikinn

Gidsel fékk beint rautt spjald eftir aðeins átta mínútna leik en það hafði ekki teljandi áhrif á Þýskalandsmeistarana, sem fóru nokkuð létt með franska félagið.

Nantes náði að minnka muninn í tvö mörk á einum tímapunkti meðan Füchse Berlin var með tvær tveggja mínútna brottvísanir á sama tíma, en eftir að jafnt varð aftur með liðunum varð leikurinn ójafn.

Füchse Berlin skoraði nánast að vild og leiddi með sex mörkum í hálfleik, undir lokin voru leikmenn Nantes nánast uppgefnir og gáfu frá sér fullt af ódýrum mörkum þar til lokaflautið gall og tíu marka tap var niðurstaðan.

Í fjarveru Gidsel, sem er alla jafnan markahæsti maður Füchse Berlin, tók Tim Freihofer við markaskorun úr vinstra horninu og endaði markahæstur með tíu mörk.

Füchse Berlin fer því í úrslitaleikinn á morgun og mætir þar annað hvort Magdeburg eða Barcelona, sem spila sinn undanúrslitaleik klukkan fjögur.