Nantes vann bronsið sem Barcelona nennti ekki

Nantes datt út í undanúrslitum með sannfærandi tapi gegn Fucshe Berlin. Barcelona var hins vegar nálægt því að komast í úrslitaleikinn en tapaði leiknum gegn Magdeburg í gær á lokasekúndunni.

Seint verður sagt að Barcelona hafi tekið bronsleiknum í dag mjög alvarlega. Liðið mætti illa til leiks og virtist varla nenna að spila, þrátt fyrir að Dika Mem hafi verið memm eftir að hafa farið meiddur af velli.

Nantes skoraði fyrstu þrjú mörkin og tók fljótt fimm marka forystu, sem hélst nokkurn veginn alveg til enda. Lokatölur 30-25 í lítt spennandi leik.

Hægri hornamaðurinn Kauldi Odriozola Yeregui var markahæstur hjá Nantes með sex mörk og fullkomna skotnýtingu.

Framundan er úrslitaleikur Meistaradeildarinnar klukkan fjögur í dag þar sem þýsku liðin Fucshe Berlin og Magdeburg mætast. Gísli Þorgeir Kristjánsson og Ómar Ingi Magnússon verða þar í eldlínunni.