Fær­eyingar efstir þrátt fyrir sigur Ís­lands í síðasta leik

Strákarnir okkar unnu öruggan sigur gegn Norður-Makedóníu í lokaleik sínum í dag, 34-28, og það hefði mögulega dugað ef að Færeyjar hefðu tapað fyrir Rúmeníu fyrr í dag.

Færeyjar unnu sinn leik hins vegar af öryggi, 35-28, þar sem Óli Mittún var enn á ný markahæstur með níu mörk.

Færeyingar enduðu því í efsta sæti riðilsins, með fimm stig, en Rúmenar fylgja þeim áfram í milliriðla eftir að hafa unnið bæði Ísland og N-Makedóníu.

Ísland endaði í 3. sæti með þrjú stig, eftir sigurinn í dag og jafnteflið við Færeyjar, en tapið gegn Rúmenum í fyrsta leik reyndist dýrkeypt.

Ísland var 15-14 yfir eftir fyrri hálfleik gegn N-Makedóníu í dag og endaði eins og fyrr segir á að vinna leikinn með sex marka mun.

Elmar Erlingsson var á ný markahæstur Íslands í dag með níu mörk en Össur Haraldsson kom næstur með sex og Haukur Ingi Hauksson skoraði fimm. Andri Fannar Elísson, Sigurður Páll Matthíasson og Skarphéðinn Ívar Einarsson skoruðu fjögur mörk hver, og þeir Birkir Snær Steinsson og Eiður Rafn Valsson sitt markið hvor.

Ísland spilar næst í Forsetabikarnum, á mánudag og þriðjudag, og mætir Mexíkó og Marokkó í þeim leikjum.