Valur fær öflugan leik­mann með gríðar­langa lokka

Stone lék með Kouvottaret í Finnlandi og var þar að meðaltali með 21,5 stig í leik, 7 fráköst, 4,7 stoðsendingar og 2,5 stolna bolta.

Síða hárið hennar, sem sjálf Hallgerður langbrók hefði sjálfsagt orðið stolt af, vakti athygli finnskra fjölmiðla þó að hæfileikar hennar gerðu það fyrst og fremst. Hún var til að mynda valin leikmaður mánaðarins í febrúar síðastliðnum og skilaði þá stórkostlegum tölum því hún skoraði að meðaltali 27,3 stig í leik, tók 8 fráköst og gaf 6 stoðsendingar.

„Reshawna er fjölhæfur bakvörður sem getur búið til körfur fyrir sjálfa sig og aðra og getur einnig skotið afar vel. Auk þess að búa yfir miklum hæfileikum er hún frábær leiðtogi og við hlökkum til að sjá hana á vellinum í vetur,“ segir í tilkynningu frá Val.

Þjálfarinn Jamil Abiad fagnar komu Stone:

„Reshawna er nákvæmlega sú tegund leikmanns sem okkur hefur vantað til að komast á næsta stig. Hún kemur úr sterkri deildarkeppni þar sem hún stóð sig frábærlega. Ég er mjög spenntur að sjá hana á vellinum með stelpunum okkar í vetur,“ segir Jamil í tilkynningunni og sjálf er Stone spennt:

„Ég hlakka virkilega til að vinna með Jamil þjálfara liðsins, nýjum liðsfélögum mínum og samfélaginu hjá Val. Ég er mjög þakklát fyrir þetta tækifæri og get ekki beðið eftir að leggja mitt af mörkum til áframhaldandi velgengni liðsins.“