Eig­andi Jets í NFL kaupir stóran hlut í Crystal Palace

Johnson eignast ekki aðeins 43 prósent hlut í ensku bikarmeisturunum heldur mun hann væntanlega tryggja það í leiðinni að Crystal Palace fái keppnisrétt í Evrópudeildinni á komandi leiktíð. ESPN segir frá.

Johnson kaupir hlut bandaríska viðskiptajöfursins John Textor. Textor á einnig stóran hlut í franska félaginu Lyon. Lyon keppir einnig í Evrópudeildinni á næsta tímabili og sami eigandi má ekki vera með tvö lið í sömu Evrópukeppni.

Forráðamenn Crystal Palace hafa verið í viðræðum við UEFA, Knattspyrnusamband Evrópu, síðustu vikur og nú virðist lausnin vera fundin. 

Palace vann sér sæti í Evrópukeppni í fyrsta sinn með því að vinna Manchester City í úrslitaleik ensku bikarkeppninnar í vor.

Johnson er 78 ára gamall og var sendiherra Bandaríkjanna í Bretlandi frá 2017 til 2021. Hann reyndi á sínum tíma að kaupa Chelsea af Roman Abramovich en tókst ekki. Hann hafði áður lýst því yfir að hann væri stuðningsmaður Chelsea og þarf því núna að sýna ást sína á Palace í verki.

Johnson er afabarn Robert Wood Johnson I, stofnanda Johnson & Johnson lyfjafyrirtækisins og auður hans kemur þaðan.