Valskonur fá fyrrum Íslandsmeistara til liðsins

Þóranna er uppalinn Keflvíkingur, varð Íslandsmeistari með liðinu árið 2017 og bikarmeistari árið 2018. Undanfarin tvö ár hefur hún stundað MBA meistaranám og leikið með liði Loyola Chicago á efsta styrkleikastigi bandaríska háskólaboltans.

„Við hlökkum til að sjá Þórönnu á vellinum þar sem hún mun koma með mikla orku, framúrskarandi vörn og verða frábær viðbót við Valsstúlkur“ segir í tilkynningu Vals sem má sjá hér fyrir neðan.

„Ég er mjög spennt að ganga til liðs við Val fyrir komandi tímabil. Eftir góð samtöl við Jamil og vandlega íhugun fannst mér þetta vera rétta umhverfið fyrir mig. Ég hlakka til að vinna með öflugum hópi og verða hluti af Valsfjölskyldunni!“ segir Þóranna.

„Þóranna er leikmaður með mikla orku og mun færa liðinu mikið á komandi tímabili. Hennar árásargjarni leikstíll og reynsla úr NCAA mun styrkja liðið og ég hlakka til að sjá hana á vellinum.“ segir þjálfari liðsins, Jamil Abiad.

Þóranna er annar leikmaðurinn sem Valur semur við síðustu vikuna, á eftir hinni lokkalöngu Re‘Shawna Stone.