Von­brigði að að­eins tvær konur komi fram á Kótelettunni

Í yfirlýsingu frá Kítón segir að það sé óviðundandi að á dagskrá með 34 atriðum séu aðeins tvær tónlistarkonur. Katla Vigdís Vernharðsdóttir er formaður Kítón en hún er í hljómsveitunum Celebs og Betweens. Hún tók við sem formaður í maí. Hátíðin fer fram næstu helgi, 10. til 12. júlí, á Selfossi. 

„Ísland á áberandi mikið af framúrskarandi tónlistarkonum sem koma reglulega fram og því er enga afsökun hægt að finna fyrir því að aðeins tvær hafi ratað á auglýsta dagskrá Kótelettunnar í ár. Vald hátíðarskipuleggjenda er augljóst og því fylgir ábyrgð sem er óásættanlegt að hunsa.“

Fyrirmyndir skipti miklu máli

Þar segir einnig að með því að bjóða tónlistarkonum ekki á svið skapist vítahringur þar sem skortur á sýnileika samkynja fyrirmynda valdi á endanum skorti á tónlistarkonum.

„Samkynja fyrirmyndir hafa sterkari áhrif og skiptir það því gríðarlegu máli að ungar upprennandi tónlistarkonur geti speglað sig í þeim sem þær sjá koma fram uppi á sviði. Stjórn KÍTÓN setur sér það að markmiði að rýna til gagns og vonum við því að hátíðarhaldarar taki vel í þessa rýni okkar á dagskránni og geri betur í framhaldinu.“

Reyndu að fá fleiri konur

Einar Björnsson, skipuleggjandi hátíðarinnar, segir það rétt að hlutfallið af atriðum með konum sé lægra nú en undafarinn ár. Skipuleggjendur séu meðvitaðir um það og þyki það miður.

Þau hafi reynt að hafa fleiri konur á dagskránni í ár og hafi til dæmis reynt að fá Siggu Beinteins, Ragnhildi Gísladóttur, Inspector Spacetime og fleiri en einhverjar hafi þegar verið bókaðar og einhverjar hafi ekki átt heimagengt.

„Við viljum hafa dagskrána fjölbreytta ár frá ári, í fyrra komu til dæmis ellefu kvenmenn fram á Kótelettunni.“

Einar tekur fram að í ár séu fleiri konur sem koma fram en eru á auglýstri dagskrá. Til dæmis sé eitt af leyniatriðunum kona. Þá sé kona í hljómsveit Koppafeitis auk þess sem Andrea Gylfadóttir muni koma fram ásamt Todmobil og hljómsveitinni Út í Hött fram á upphitunartónleikunum á fimmtudeginum. Í heildina séu því kvenkyns listamenn sjö á hátíðinni í ár en ekki tveir.

Færri konur í poppi en karlar

„Við þurfum að hátta dagskránni eftir vinsældum og hvað hentar hverju sinni. Við höfum ávallt verið með konur í okkar dagskrá. Við erum fyrst og fremst að sækjast eftir að fá til okkar tónlistafólk sama hvaða kyn það hefur. Því miður er það staðreynd að framboð af kvenatriðum í poppsenunni, sem hátíðin byggir grunn sinn á, er lægra en atriða sem karlmenn skipa,“ segir Anna Stella, ein af skipuleggjendum hátíðarinnar, í skriflegu svari til fréttastofu.