Bogi hljóp í skarðið fyrir Krist­björgu Kjeld og ærði á­horf­endur

Sviðslistahúsið Afturámóti frumsýndi Ber er hver, nýjan íslenskan gamanleik, í Háskólabíói á föstudag. Verkið fjallar um tvíburabræðurna Guðmund og Gísla sem hittast aftur eftir tíu ára aðskilnað. Tvíburabræðurnir eru báðir leiknir af Kristni Óla Haraldssyni, sem er betur þekktur sem Króli, en hann er einnig höfundur verksins.

Annar bróðirinn er á flótta undan handrukkurum og hinn er að reyna að svíkja pening út úr húsfélaginu og sannfæra kærustuna sína um að hann sé ekki að halda framhjá henni. Í þokkabót þekkir enginn bræðurna í sundur.

Höfundur og leikur tvö aðalhlutverk

Ber er hver varð til sem lokaeinstaklingsverkefni Kristins á leikarabraut í Listaháskóla Íslands, en hann útskrifaðist þaðan núna í júní. 

Kristinn skrifaði verkið ásamt vinum sínum Hjalta Rúnari Jónssyni og Vilhjálmi B. Bragasyni, en það var Ólafía Hrönn Jónsdóttir sem átti hugmyndina að því að Króli myndi leika tvíbura. 

Leikstjóri verksins er Karla Kristjánsdóttir, en hún útskrifaðist úr sviðshöfundanámi LHÍ á dögunum.

Auk Króla leikur fjöldi ungra gamanleikara í verkinu: Hólmfríður Hafliðadóttir leikur kærustu annars bróðursins, Vilhjálmur B. Bragason leikur formann húsfélagsins, Kolbeinn Sveinsson og Hjalti Rúnar Jónsson leika handrukkarana Daníel og Lárus, og Össur Haraldsson þreytir frumraun sína á leiksviði. 

En þá er ótalinn einn leikari.

Alltaf nýr óvæntur gestur

Þakið ætlaði að rifna af húsinu á frumsýningunni þegar óvæntan gest bar að garði og hann reyndist vera Bogi Ágústsson, fyrrverandi fréttaþulur Ríkisútvarpsins til áratuga.

Þegar verkið varð fyrst til í Listaháskólanum fór leiklistargoðsögnin Kristbjörg Kjeld, með hlutverk Boga. Þó Kristbjörg sé nýlega orðin níræð er hún á ferð og flugi í sumar og sá sér því ekki fært að vera með aftur í sýningunni og hópurinn þurfti því að fylla í stór spor.

Niðurstaðan varð að fá mismunandi leikara til þess að leika hlutverk Kristbjargar og láta það alltaf koma áhorfendum á óvart hver birtist í verkinu.

Það tókst á frumsýningunni í Háskólabíói þegar Bogi Ágústsson gekk inn á sviðið. Ekki nóg með að Bogi hafi tryllt salinn heldur sýndi hann áður óséða leikræna tilburði, bætti við bröndurum og vafði áhorfendum um fingur sér.

Aðeins eru fyrirhugaðar tvær sýningar til viðbótar af Ber er hver, þann 16. og 25. júlí, svo þau sem vilja létta sér lundina í sumar ættu að tryggja sér miða fyrr en síðar.