Scheffler tryggði sér sinn fjórða risatitil

Hjörtur Leó Guðjónsson skrifar 20. júlí 2025 17:43

Scheffler heldur á könnunni frægu í annarri og syninum Bennett Scheffler í hinni. Hann átti ótrúlega helgi. Andrew Redington/Getty Images

Bandaríkjamaðurinn Scottie Scheffler tryggði sér sinn fjórða risatitil á ferlinum er hann tryggði sér sigur á Opna breska meistaramótinu í golfi í dag.

Scheffler var með örugga forystu fyrir lokahringinn í dag og þurfti í raun aldrei að hafa miklar áhyggjur af því að nokkur myndi ógna forskoti hans.

Klippa: Scheffler vann með yfirburðum

Hann byrjaði daginn með fjögurra högga forystu, en náði mest sjö högga forystu á einum tímapunkti. Mögulega hefur farið örlítið um stuðningsmenn Schefflers þegar hann nældi sér í tvöfaldan skolla á áttundu braut, en hann svaraði því með fugli á þeirri níundu og var fljótur að rétta úr kútnum á ný.

Scheffler endaði daginn á 68 höggum, eða þremur höggum undir pari. Alls lék hann hringina fjóra á 17 höggum undir pari, fjórum höggum á undan Harris English sem endaði annar. Það var svo Chris Gotterup sem endaði þriðji á 12 höggum undir pari.

Allt það helsta frá deginum í dag má sjá í spilaranum að ofan.

Í þeim að neðan má sjá það helsta frá gærdeginum á Opna mótinu úr Sportpakka Sýnar.

Opna breska