Spáin versnar á ný og gul við­vörun í Eyjum

„Spáin hefur klárlega versnað frá því í gær. Hún leit betur út í gær, þá var ekki jafn mikill vindur í þessu og úrkoman ívið minni,“ segir Katrín Agla Tómasdóttir veðurfræðingur í samtali við fréttastofu. 

Tjaldútilegumenn vari sig

Gul viðvörun tekur gildi á suðurlandi klukkan tíu á föstudagskvöld til klukkan tvö aðfaranótt laugardags. Veðurfræðingar spá suðaustan 13-18 m/s við ströndina og í Vestmannaeyjum og talsverðri rigningu. 

Varað er við því að tjöld geti fokið og fólk er hvatt til að huga að lausamunum. Þá er varað við snörpum vindhviðum við fjöll og varasömum aðstæðum fyrir ökutæki sem taka á sig mikinn vind.

Katrín Agla spáir besta veðrinu á Norðausturlandi, þar líti spáin ágætlega út.

„Það verður einhver rigning aðfaranótt laugardags og geta orðið dálitlar skúrir seinni partinn. En það er útlit fyrir að þar verði minnsti vindurinn, yfirleitt hlýtt í veðri og bjart, hiti að tuttugu stigum.“

Besta veðrið á Norðausturlandi

Hún segir versta veðrið bundið við suðvestanvert landið, en úrkoman verði að auki mikil á Suðausturlandi. 

„En spáin hefur versnað um allt land og svo er aðeins meiri vindur á laugardeginum sjálfum en var í gær.“

Dýpkandi lægð á Grænlandshafi nálgast landið á morgun, þá gengur í suðaustan 8-15 m/s og fer að rigna fyrri part dags og þá fer að rigna á suðvestanverðu landinu. 

Skil frá lægðinni gangi yfir landið annað kvöld og þá hvessir heldur syðst á landinu. Talsverð rigning verður suðaustan og sunnanlands. Þegar þau ganga yfir gengur yfir suðlægari átt, dregur úr vindi og bætur aftur í vind á vestanverðu landinu, 10-18 m/s og rigning með köflum.

Á sunnudaginn verður áttin suðvestlægari og skúrir á sunnan- og vestanverðu landinu og dregur smám saman úr vindi og vætu þegar líður á daginn. Útlit er fyrir hægan vind á mánudag.