Lífið

Menningarperlan aftur komin í sitt gamla horf

Agnar Már Másson skrifar
Austurbæjarbíó hafði lengi verið einn helsti viðburðastaður Reykjavíkur þar til því var breytt í safn og síðar pílubar. Barinn lifir enn góðu lífi en nú hefur staðnum aftur verið breytt í tónleikahús.
Austurbæjarbíó hafði lengi verið einn helsti viðburðastaður Reykjavíkur þar til því var breytt í safn og síðar pílubar. Barinn lifir enn góðu lífi en nú hefur staðnum aftur verið breytt í tónleikahús. Vísir/Agnar

Tónlistarmenn og gestir á Innipúkanum eru að sögn viðburðarhaldara hæstánægðir við aðstöðuna í Austurbæjarbíó sem er að mörgu leyti aftur farin að gegna sínu gamla hlutverki sem tónleika- og menningarhús. 

Innipúkinn hefur að sögn tónleikahaldara gengið svo gott sem hnökralaust fyrir sig. Uppselt hafi verið bæði á föstudags- og laugardagskvöld og Eldar Ástþórsson, sem hefur skipulagt hátíðina síðustu fimmtán ár, segir að hver fari að verða síðastur að kaupa sunnudagskvöldið áður en það seljist upp.

Austurbæjarbíó er eins og mörgum er kunnugrt sögufrægt bíó-, leik- og tónleikahús en bíóið hefur reyndar á síðustu árum verið lagt undir pílubar.

„Húsið er núna að verða aftur tónleika og menningarhús,“ segir Eldar í samtali við fréttastofu. „Og það er mjög gaman að Innipúkinn fái að ryðja brautina þar,“ Hann segir að tónlistarmönnum lítist mjög vel á salinn.

Vaka litla hékk í Eldari Ástþóri þegar blaðamaður ræddi við hann . Gólfið í aðalsalnum var klístrað eftir laugardaginn, væntanlega vegna þess að bjór hafi skest á það.Vísir

Sögur fara af því að þegar Ragga Gísla hafi lokið sínu setti á tónleikunum á föstudaginn hafi hún óskað Austurbæingum til hamingju með „félagsheimilið“ enda hafði húsið lengi verið menningarmiðja austurbæjarins í Reykjavík.

Húsið var fyrst opnað árið 1947 og var það nýtt bæði undir kvikmyndasýningar og tónleikahald. Einn frægasti viðburður sem haldinn hefur verið í húsinu eru tónleikar The Kinks spiluðu þar árið 1965, sem voru á þeim tíma sennilega þekktasta hljómsveit sem hafði spilað á Íslandi. Þá var skemmtistaðurinn Silfurtunglið rekinn í húsinu á sjötta áratuginum og er efri hæðin einmitt nefnd í höfuðið á skemmtistaðnum gamla.

Þessi gamla menningarperla breyttist svo í safn fyrir túrista árið 2017 þegar „Tales from Ice­land“ opnaði en þremur árum síðar varð safninu lokað í í stað þess opnaður pílustaðurinn Bullseye, sem er enn starfandi í húsinu í dag.  

Félag athafnamannsins Magnúsar Berg Magnússonar keypti húsnæðið í vor og Steinþór Helgi Arnsteinsson og Ásgeir Guðmundsson, sem reka meðal annars Röntgen, tóku við rekstrinum. Pílustaðuirnn fylgdi með kaupunum en létu gera upp salinn sem er nú tilvalinn í tónleikahald og var hann prufukeyrður í síðasta mánuði þegar teknóhátíðin Nærbuxur var haldin. Einnig hélt raftónlistarsveitin Hercules & Love Affair tónleika þar í apríl.

Hvað hátíðina varða þá hefur fjölbreyttur hópur á breiðu aldursbili sótt tónleikana, að sögn Eldars. Í kvöld heldur veislan áfram og Eldar kveðst spenntastur fyrir Ásdísi en einnig Þórunni Antóníu og Berndsen, sem munu flytja plötuna Star Crossed frá 2012 sem hefur öðlast hálfgerðan költ-status á síðustu árum. 


Tengdar fréttir

Fyrstu tónleikar Purrksins í fjörutíu ár

Purrkur Pillnik, ein ástsælasta pönksveit landsins, mun um helgina frumflytja þrjú glæný lög. Þetta er í fyrsta sinn í fjörutíu ár sem sveitin spilar nýja hljóma en þeir segjast alls ekki ætla að baða sig í fortíðinni. Yrkisefni pönkaranna er að þessu sinni loftslagsváin og kórónuveirufaraldurinn meðal annars, að sögn aðalsöngvarans.

Ragga Gísla og Hips­um­haps á Innipúkanum sem færir sig um set

Ragga Gísla og Hipsumhapps snúa bökum saman og koma fram í sameiningu í fyrsta sinn á tónlistarhátíðinni Innipúkanum í Reykjavík um verslunarmannahelgina, 1. til 3. ágúst. Hátíðin flytur sig nú um set og verður haldinn í Austurbæjarbíó í stað Ingólfsstrætis þar sem hátíðin hefur verið haldin síðustu ár.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.