Sögu­legur hagnaður á samrunatímum

Kvika skilaði uppgjöri til Kauphallar í dag. Þar kemur fram að rekstrarkostnaður hafi aukist um 250 milljónir á milli ára eða sem nemur rúmum níu prósentum. Aukinn hagnaður eftir skatt er upp á 85 prósent.

Ármann Þorvaldsson bankastjóri segir rekstrarhagnaðinn þann mesta sem bankinn hafi skilað á fjórðungi. Sala á hlut ríkisins í Íslandsbanka hafi gengið vel, fyrsta skuldabréf bankans í evrum hafi verið gefið út og nýr fagfjárfestasjóður upp á átta milljarða stofnaður innan eignastýringar.

Nú standi fyrir dyrum samrunaferli við Arion banka. Sameinaður banki hafi burði til að skapa aukið virði fyrir alla hagsmunaaðila.

„Gert er ráð fyrir að samrunaferlið taki að minnsta kosti 9–12 mánuði. Nú er unnið hörðum höndum að áreiðanleikakönnun og undirbúningi forviðræðna við Samkeppniseftirlitið með það að markmiði að staðfesta raunhæfi verkefnisins og greina hugsanlegar hindranir snemma í ferlinu. Á meðan ferlinu vindur áfram höldum við ótrauð áfram að vinna að daglegum rekstri og byggjum á þeim árangri sem þegar hefur náðst.“