Ný­liðarnir byrja á góðum sigri

Þórsarar styrktu lið sitt rækilega fyrir síðasta tímabil í 1. deild og unnu deildina í kjölfarið. Meðal þeirra leikmanna sem snéru heim til Akureyrar voru þeir Oddur Grétarsson, sem hafði verið ellefu ár í atvinnumennsku í Þýskalandi, og Þórður Tandri Ágústsson, sem lék þrjú tímabil með Stjörnunni.

Þeir félagar voru markahæstir í kvöld með sex og fimm mörk en Nikola Radovanovic fór mikinn í marki Þórs og varði 20 skot.

Bernard Kristján skoraði fyrsta mark kvöldsins fyrir ÍR en það var í eina skiptið sem gestirnir leiddu. Þórsarar náðu fljótt undirtökum í leiknum og leiddu í hálfleik með sjö mörkum, 16-9. ÍR-ingar klóruðu aðeins í bakkann í seinni hálfleik en Þórsarar unnu að lokum öruggan sex marka sigur, 29-23.

Markahæstur í liði ÍR var Baldur Fritz Bjarnason fimm mörk.

Í hinum leik kvöldsins vann ÍBV eins marks sigur, 30-29, í leik sem varð æsispennandi undir lokin. Eyjamenn náðu upp góðu sex marka forskoti í seinni hálfleik, 25-19, en gestirnir komu heldur betur til baka og jöfnuðu metin í 28-28 þegar tæpar fimm mínútur voru eftir.

Heimamenn reyndust aðeins stöðugri á svellinu á lokasprettinum en Ívar Bessi Viðarsson skoraði sigurmarkið þegar mínúta var til leiksloka og þar við sat.

Markahæstur í liði ÍBV var Dagur Arnarsson með sjö mörk en Haukur Ingi Hauksson skoraði átta fyrir HK.