Innlent

Einn fluttur á Land­spítalann frá Fjalla­baki

Jón Þór Stefánsson skrifar
Slysið mun hafa átt sér stað við Fjallabak. Myndin er úr safni.
Slysið mun hafa átt sér stað við Fjallabak. Myndin er úr safni. Vísir/Rax

Einn var fluttur með sjúkraflugi þyrlu Landhelgisgæslunnar á Landspítalann í Fossvogi eftir mótorhjólaslys við Fjallabak, norðan Mýrdalsjökuls. Þyrlan lenti um korteri yfir fimm við sjúkrahúsið.

Þetta staðfestir Ásgeir Erlendsson í samtali við fréttastofu. Hann hefur ekki upplýsingar um ástand þess sem var fluttur.

Garðar Már Garðarsson, yfirvarðstjóri hjá Lögreglunni á Suðurlandi, segir í samtali við fréttastofu að samkvæmt lögreglumönnum á vettvangi hafi maðurinn hafi verið alvarlega slasaður, en ástand hans á hafi þó verið stöðugt.

Hann segir að ekki liggi nákvæmlega fyrir hvað hafi átt sér stað. Maðurinn hafi verið einn á mótorhjóli en í ferð með hópi. 

„Hann var kominn aðeins á undan hópnum, þannig að það sá enginn hvað gerðist nákvæmlega. En hann lendir þarna út í grjóti.“

Greint var frá útkallinu fyrr í dag. Lögreglunni á Suðurlandi mun hafa borist útkall tuttugu mínútur í fjögur. Í kjölfarið var Landhelgisgæslunni gert viðvart og sendi hún þyrlu sína á vettvang.

Auk þyrlunnar voru lögregla, sjúkraflutningamenn og björgunarsveitir kölluð út. Bæði lögregla og sjúkraflutningamenn eru komin á staðinn þar sem þau meta áverka hins slasaða.

Fréttin hefur verið uppfærð.




Fleiri fréttir

Sjá meira


×