Sá látni var á rjúpna­veiðum þegar hann varð fyrir voðaskotinu

Óðinn Másson, 52 ára gamall Mosfellingur, lést eftir að hann varð fyrir voðaskoti úr haglabyssu á föstudagskvöld. Slysið átti sér stað nærri Apavatni í Bláskógabyggð.

Að sögn Jóns Gunnars Þórhallssonar, yfirlögregluþjóns hjá lögreglunni á Suðurlandi, var Óðinn á rjúpnaveiðum við annan mann þegar slysið varð. Mbl.is sagði fyrst frá því fyrr í dag.

Jón Gunnar segist ekki geta tjáð sig frekar um rannsóknina sem standi enn yfir né stöðu veiðifélagans. Vettvangsrannsókn hafi haldið áfram í dag og reynt hafi verið að tryggja það sem hægt væri að tryggja þar á meðan veður leyfir. Gul viðvörun vegna töluverðrar snjókomu tekur gildi á Suðurlandi annað kvöld.