Allt í miklum blóma á Hlíðar­enda síðan Arnór Snær kom heim

Þetta var fjórði deildarsigur Vals í röð en Eyjamenn hafa á móti aðeins náð í eitt stig í síðustu þremur leikjum sínum.

Sigurinn skilar Valsmönnum upp í sextán stig og upp í annað sætið. Eyjamenn eru í sjötta sæti þegar deildarkeppnin er hálfnuð.

Eyjamenn voru yfir í upphafi leiks en í stöðunni 4-5 fyrir ÍBV þá skoruðu Valsmenn fimm af næstu sex mörkum og tóku öll völd.

Valsliðið var síðan komið sjö mörkum yfir í hálfleik, 17-10. Seinni hálfleikurinn var síðan hálfgert formsatriði enda hleyptu Valsmenn gestunum úr Eyjum ekkert inn í leikinn.

Umræddur Arnór Snær var atkvæðamestur í Valsliðinu með átta mörk og sex stoðsendingar en hann nýtti 73 prósent skota sinna í leiknum.

Hinn stórefnilegi Gunnar Róbertsson skoraði sex mörk og Daníel Montoro var með fimm mörk. Þeir Dagur Árni Heimisson og Magnús Óli Magnússon voru með fjögur mörk hvor og gáfu samanlagt átta stoðsendingar.

Andri Erlingsson var atkvæðamestur hjá ÍBV með fimm mörk og fjórar stoðsendingar. Hinrik Hugi Heiðarsson skoraði fjögur mörk eins og Ívar Bessi Viðarsson. Petar Jokanovic varði tvö víti en það dugði skammt.