Spilaði með brotið bringu­bein í tvo mánuði

Hinn 26 ára Gidsel hefur þegar átt glæstan feril og unnið meistaratitla í Danmörku og Þýskalandi, sem og heimsmeistaratitla og Ólympíugull með danska landsliðinu. Hann leggur jafnan allt í sölurnar og fær litla hvíld, enda segist hann ekki geta hugsað sér að spila bara 20 mínútur í leik eða af 80% krafti.

Þetta kemur fram í nýrri bók sem heitir Gidsel og Pytlick – bestu makkerar í heimi, og fjallar um þá Gidsel og Simon Pytlick liðsfélaga hans í danska landsliðinu og áður hjá GOG í Danmörku.

TV 2 hefur birt kafla úr bókinni þar sem Gidsel ræðir um það þegar hann sleit krossband í hné í bronsleiknum á EM 2022 og sneri sterkari til baka – raunar svo sterkur að hann lét brotið bringubein ekki stöðva sig í að spila með Füchse Berlín síðustu tvo mánuði tímabilsins í fyrravor.

„Þessi meiðsli [krossbandsslitin] gerðu mig að atvinnuíþróttamanni. Úr því að vera atvinnumaður í handbolta en áhugamaður í því að vera íþróttamaður með öllu sem því fylgir, varð ég þarna að íþróttamanni sem skildi hvað það þýðir að hugsa um og þroska líkama sinn,“ sagði Gidsel sem virðist hafa orðið að miklu hörkutóli:

„Ég spilaði í tvo mánuði á síðasta tímabili með brotið bringubein fyrir Füchse Berlin, sem ég uppgötvaði ekki fyrr en seinna. Ég fann ekki fyrir því. Við uppgötvuðum það ekki fyrr en í skylduskoðun fyrir Ólympíuleikana í júlí. 

Læknirinn fór með ómskoðunartækið yfir brjóstkassann á mér og þá var þar allt í einu bara gat. Læknirinn spurði hvort ég hefði brotið bringubeinið. Ég sagði nei. En þá sagði hann að ég hefði gert það, hann gæti séð það greinilega. En sem betur fer var það byrjað að gróa, svo það þurfti ekkert að gera í því. 

Það segir sitthvað um að maður fer inn á völlinn með marga kvilla, oft eitthvað sem maður veit ekki af. Og já, ég hef verið meiddur eftir Ólympíuleikana, en ekki nógu mikið til að það hafi haldið mér frá vellinum,“ sagði Gidsel í bókinni.