Stjórn­mála­menn stigu trylltan dans í kjaftfullum Austur­bæ

Kristín og Ólöf héldu sams konar viðburð fyrir ári síðan fyrir fullu húsi í Iðnó en nú varð Austurbæjarbíói fyrir valinu sem tekur töluvert fleiri gesti. Það gilti einu, uppselt varð á viðburðinn á tveimur mínútum þegar hann fór í sölu í nóvember. Venjulegur miði kostaði 8.900 krónur en einnig voru í boði „auðmannaborð“ fyrir fimm manns á 89.000 krónur.

Fréttastofa var með fulltrúa á vettvangi í gær sem sagði Austurbæinn hafa verið kjaftfullan. Þá hafi góð tilboð verið á barnum sem skiluðu sér í ótæpilegri drykkju og æðisgenginni stemmingu. Hver gestur fékk gjafapoka sem innihélt ýmsa glaðninga og var mikið lagt í framleiðsluna með tveimur stórum skjáum.

Meðal gesta í gær voru Marta María Winkel á Smartlandi, athafnakonan Lilja Pálmadóttir, fjölmiðlamaðurinn Stefán Einar Stefánsson, Heiðrún Lind Marteinsdóttir hjá SFS, Gerður Arinbjarnardóttir í Blush og fleiri góðir.

Dansatriði, gestir grillaðir og Jens sló í gegn

Viðburðurinn hófst á stóru og metnaðarfullu dansatriði þar sem Kristín og Ólöf dönsuðu við „Daddy Cool“ með Boney M ásamt góðum hópi fólks. 

Þar stigu á svið Magnús Ragnarsson, stórvinur stúlknanna; Snorri Másson, varaformaður Miðflokksins; Sigurður Ingi Jóhannsson, formaður Framsóknar; Hildur Björnsdóttir, oddviti Sjálfstæðisflokksins í Reykjavík; Sigríður Andersen, þingmaður Miðflokksins; Hildur Sverrisdóttir, þingmaður Sjálfstæðisflokksins, Einar Þorsteinsson, oddviti Framsóknar í Reykjavík og Sigríður Margrét Oddsdóttir, framkvæmdastjóri Samtaka Atvinnulífsins.

Eftir það tók við hlaðvarpshlutinn þar sem Ólöf og Kristín spjölluðu saman, baunuðu á hinn og þennan og fengu síðan góða gesti upp á svið til að grilla. Meðal þeirra sem fóru upp á svið voru Sólveig Anna Jónsdóttir, formaður Eflingar og Sigríður Andersen.

Síðan var Jens Garðar Helgason, varaformaður Sjálfstæðisflokksins, dreginn upp á svið til að taka „Slá í gegn“ með Stuðmönnum og söng þá allur salurinn með.