Skelfing greip um sig þegar björgunar­bátnum hvolfdi

Veður var slæmt þessa nótt og var skipið komið inn fyrir skerjafláka undan landi. Þá voru veðuraðstæður mjög slæmar á strandstað, vaxandi straumur, áhlaðandi og mikill vindur.

Beiðni um dráttarbát barst frá skipinu seint um nótt. Skipstjórinn tilkynnti strandið til Vaktstöðvar siglinga og Stjórnstöðvar Landhelgisgæslunnar sem kallaði til varðskip sín og þyrlur og önnur skip á svæðinu og kom boðum til lögreglu og björgunarsveita.

Í fyrstu var ekki vitað hvar skipið hafði strandað en björgunarskip voru send út bæði frá Sandgerði og Grindavík. Skipið fannst svo langt uppi í fjöru við Hvalsneskirkju en fjórtán manns voru í áhöfn. Viðbragðsaðilar settu upp aðstöðu við Hvalsneskirkju en þaðan sást vel yfir strandstaðinn. 

Danska strandgæsluskipið Triton fór til aðstoðar en átta áhafnarmeðlimir af Triton fóru út á bát til þess að freista þess að aðstoða áhöfn flutningaskipsins. Það endaði með skelfingu þegar bátnum hvolfdi og þeir féllu allir útbyrðis. Sjö þeirra var bjargað með ævintýralegum hætti úr öldum sem voru á hæð við þriggja hæða hús og vann þyrlusveit Landshelgisgæslunnar þar mikið afrek. 

Sá áttundi, Jan Nordskov Larsen, var látinn þegar að var komið og var tekinn um borð í þyrluna síðar um morguninn.

Í mars 2007 tilkynnti umhverfisráðherra að samkomulag hefði náðst við eigendur skipsins um að fjarlægja það af strandstað og var skipið dregið á haf út þann 17. apríl 2007. 

„Skítaveður“ og erfiðar aðstæður

Vilhelm Gunnarsson, ljósmyndari Vísis, var ræstur út eldsnemma þennan morgun og myndaði aðgerðir á vettvangi, þegar áhöfninni af Wilson Muuga var komið í land. Átta manna áhöfnin frá Tríton hafði þá þegar hvolft bátnum. Allar björgunarsveitir á Suðurnesjum höfðu verið kallaðar út og þá var óskað eftir aðstoð björgunarsveita af höfuðborgarsvæðinu með mesta forgangi.