Tvíbura­systurnar ó­vænt hættar

Samkvæmt tilkynningunni eru systurnar ekki bara hættar hjá Njarðvík heldur hafa þær lagt körfuboltaskóna á hilluna, aðeins 23 ára gamlar. Báðar hafa þær leikið vel yfir hundrað leiki fyrir Njarðvík í efstu deild.

Systurnar tóku sína ákvörðun í sátt og samlyndi við stjórn og þjálfarateymi Njarðvíkur, af persónulegum ástæðum.

„Anna og Lára eru frábærir félagsmenn og stórkostlegir liðsmenn. Anna á sérstaklega mikið hrós skilið fyrir að hafa dugað svona lengi miðað við erfiða meiðslasögu sem leikmaður. Aðgerðir og fleira settu strik í reikning hennar en að mati þeirra beggja var nú kominn tími til að loka þessum körfuboltakafla hjá sér,“ sagði Einar Árni Jóhannsson þjálfari Njarðvíkur.

Anna og Lára léku upp alla yngri flokkana í Njarðvík og urðu þar meðal annars Íslandsmeistarar. Þær léku einnig með Njarðvík í 1. deild kvenna, þá á grunnskólaaldri, og fóru upp um deild með liðinu. Síðar fögnuðu þær Íslandsmeistaratitli með Njarðvík og svo bikarmeistaratitlinum á síðustu leiktíð.

Þá eiga þær einnig báðar landsleiki að baki með yngri landsliðum Íslands.

Anna Lilja lék 132 leiki með Njarðvík í deild og úrslitakeppni í úrvalsdeild kvenna, og Lára Ösp á að baki aðeins færri leiki eða 112 eftir að hafa dvalið um hríð í Bandaríkjunum við nám.

Í tilkynningu Njarðvíkinga er systrunum þakkað fyrir öflugt framlag í gegnum árin, bæði innan og utan vallar.